ଫୁଲବାଣୀ: ଜଣେ ନାବାଳିକାଙ୍କୁ ଦୁଷ୍କର୍ମ କରିବା ମାମଲାର ବିଚାର କରି ଫୁଲବାଣୀ ସ୍ୱତନ୍ତ୍ର ପୋକ୍ସୋ କୋର୍ଟ ଆଜି ଅଭିଯୁକ୍ତକୁ ଦୋଷୀ ସାବ୍ୟସ୍ତ କରିବା ସହ ୧୦ ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି। ଏଥିସହ ଦୋଷୀକୁ ୧୨ ହଜାର ଟଙ୍କା ଜରିମାନା କରାଯାଇଛି। ଜରିମାନା ଅନାଦେୟ ଅଧିକ ୬ ମାସ ଜେଲ ଭୋଗିବାକୁ ଅଦାଲତ ତାଙ୍କ ରାୟରେ ଉଲ୍ଲେଖ କରିଛନ୍ତି। ଅଭିଯୁକ୍ତ ଜଣକ ହେଲେ ଫିରିଙ୍ଗିଆ ଥାନା ଅଂଚଳର ବିନୋଦ ନାୟକ।
ଘଟଣା ଅନୁଯାୟୀ, ୨୦୧୭ ଅଗଷ୍ଟ ୧୮ ତାରିଖ ରେ ୫ ବର୍ଷର ଜଣେ ନାବାଳିକା ତାଙ୍କ ସାଙ୍ଗମାନଙ୍କ ସହ ଖେଳୁଥବା ବେଳେ ସେହି ଗ୍ରାମର ବିନୋଦ ତାଙ୍କୁ କୌଶଳ କରି ଘରକୁ ଡାକି ନେଇଥିଲେ। ଘର ଭିତରେ ନାବାଳିକାଙ୍କୁ ସେ ବିବସ୍ତ୍ର କରି ଅସଦାଚାରଣ କରୁଥବା ସମୟରେ ନାବାଳିକାଙ୍କ ବାପା ଝିଅକୁ ଖୋଜି ସେଠାରେ ପହଞ୍ଚିଥିଲେ। ଘରର କବାଟ ଖୋଲିବା ପରେ ବିନୋଦ ଦୁଷ୍କର୍ମରେ ଲିପ୍ତ ଥିବା ଦେଖିବାକୁ ପାଇଥିଲେ ପିଡିତାଙ୍କ ବାପା। ଝିଅକୁ ସେଠାରୁ ଉଦ୍ଧାର କରି ଆଣିବା ପରେ ସେ ଫିରିଙ୍ଗିଆ ଥାନାରେ ଏତାଲା ଦେଇଥିଲେ। ଏତଲା ଅଧାରରେ କେସ ନଂ ୭୪ା୧୭ରେ ଏକ ମାମଲା ରୁଜୁ କରି ବିନୋଦଙ୍କୁ ଗିରଫ କରିଥିଲା। ଫୁଲବାଣୀ ପୋକ୍ସୋ କୋର୍ଟ ବିଚାରପତି ସମର ବିଳାସ ବେହେରା ୯ ଜଣଙ୍କ ସାକ୍ଷ୍ୟ ପ୍ରମାଣକୁ ଭିତ୍ତି କରି ଉପରୋକ୍ତ ଦଣ୍ଡାଦେଶ ଦେଇଛନ୍ତି। ସରକାରଙ୍କ ପକ୍ଷରୁ ସ୍ୱତନ୍ତ୍ର ପିପି ଅସୀମ ପ୍ରହରାଜ ମାମଲା ପରିଚାଳନା କରୁଥିଲେ।
