ପାଟନା: ନାବାଳିକା ବଳାତ୍କାର ମାମଲାରେ ରାଷ୍ଟ୍ରୀୟ ଜନତା ଦଳ (ଆରଜେଡି) ବିଧାୟକ ରାଜବଲ୍ଲଭ ଯାଦବ ଓ ଅନ୍ୟ ୫ଜଣ ସ୍ବତନ୍ତ୍ର ଅଦାଲତରେ ଦୋଷୀ ସାବ୍ୟସ୍ତ ହୋଇଛନ୍ତି। ଆସନ୍ତା ୨୧ତାରିଖରେ ସେମାନଙ୍କ ବିରୋଧରେ ଦଣ୍ଡ ଘୋଷଣା ହେବ। ଯାଦବ ୨୦୧୬ ମାର୍ଚରେ ସ୍ଥାନୀୟ ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ୍ଙ୍କ ଅଦାଲତରେ ଆତ୍ମସମର୍ପଣ କରି ଜାମିନରେ ଅଛନ୍ତି। ୨୦୧୬ ଫେବୃଆରୀରେ ଜନୈକ ମହିଳା ସମ୍ପୃକ୍ତ ନାବାଳିକା ସ୍କୁଲ ଛାତ୍ରୀଙ୍କୁ ଲୋଭ ଦେଖାଇ ବିଧାୟକଙ୍କ ନୱାଡ଼ା ଜିଲାସ୍ଥିତ ବାସଭବନକୁ ନେଇଥିଲେ ଓ ସେଠାରେ ବିଧାୟକ ଓ ତାଙ୍କର ୫ଜଣ ସହଯୋଗୀ ନାବାଳିକାଙ୍କୁ ବଳାତ୍କାର କରିଥିବା ଅଭିଯୋଗ ହୋଇଥିଲା। ପରେ ପୀଡ଼ିତା ଅଭିଯୁକ୍ତମାନଙ୍କୁ; ବିଶେଷ କରି ବିଧାୟକଙ୍କୁ ଚିହ୍ନଟ କରିଥିଲେ। ଏହି ମାମଲାରେ ବିଧାୟକ ଯାଦବ ୨୦୧୬ ଅକ୍ଟୋବରରେ ପାଟନା ହାଇକୋର୍ଟରୁ ଜାମିନରେ ଯାଇଥିଲେ; କିନ୍ତୁ ରାଜ୍ୟ ସରକାର ଏହା ବିରୋଧରେ ସୁପି୍ରମକୋଟର୍ଠରେ ଆବେଦନ କରିବା ପରେ ନଭେମ୍ବରରେ ଜାମିନ ନାକଚ ହୋଇଥିଲା। ସେହିବର୍ଷ ନାଲନ୍ଦା ପୁଲିସ ମାମଲାର ଅଭିଯୋଗପତ୍ର ଦାଖଲ କରିବା ପରେ ଯାଦବଙ୍କୁ ଦଳରୁ ନିଲମ୍ବନ କରାଯାଇଥିଲା। ଏହି ମାମଲାକୁ ନେଇ ଆରଜେଡି ମୁଖ୍ୟ ଲାଲୁପ୍ରସାଦ ଯାଦବ ଓ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ମଧ୍ୟରେ ବିବାଦର ସୂତ୍ରପାତ ହୋଇଥିଲା।
