ନୂଆଦିଲ୍ଲୀ : କେନ୍ଦ୍ରର ମୋଦୀ ସରକାର ରୋଜଗାର ସୃଷ୍ଟି ପ୍ରସଙ୍ଗରେ ବିରୋଧୀ ଦଳଙ୍କ ନିଶାଣରେ ଅଛି। କ୍ଷମତାକୁ ଆସିବା ପୂର୍ବରୁ ବିଜେପି ପ୍ରତିବର୍ଷ ଯୁବବର୍ଗଙ୍କୁ କୋଟିଏ ରୋଜଗାର ଦେବ ବୋଲି ଘୋଷଣା କରିଥିଲା। କିନ୍ତୁ କ୍ଷମତାକୁ ଆସିବା ପରଠାରୁ ସରକାର ନିଜ ପ୍ରତିଶ୍ରୁତି ପୂରଣ କରିବାରେ ବିଫଳ ରହିଛି। ଏବେ ନ୍ୟାସନାଲ ସାମ୍ପୁଲ ସର୍ଭେ ଅଫିସ୍ (ଜାତୀୟ ନମୁନା ସର୍ବେକ୍ଷଣ କାର୍ଯ୍ୟାଳୟ) ପକ୍ଷରୁ ବିଶେଷ ସୂତ୍ରରୁ ପ୍ରକାଶିତ ରିପୋର୍ଟ ମୋଦୀ ସରକାରର ବିଫଳତାକୁ ପଦାରେ ପକାଇଛି। ବିଶେଷ ସୂତ୍ରରୁ ଆସିଥିବା ଏହି ରିପୋର୍ଟରେ ଦର୍ଶାଯାଇଛି ଯେ ଦେଶରେ ପୁରୁଷ ରୋଜଗାରିଆଙ୍କ ସଂଖ୍ୟା କମିବାରେ ଲାଗିଛି। ୨୦୧୭-୧୮ ଏନ୍ଏସ୍ଏସ୍ଓ ଦ୍ୱାରା ପ୍ରକାଶିତ ପିଏଲଏଫଏସ୍ ଅନୁସାରେ ୧୯୯୩-୯୪ ପରେ ୨୦୧୭-୧୮ରେ ପୁରୁଷ ରୋଜଗାର ସଂଖ୍ୟା ୨୮.୬ କୋଟି ହ୍ରାସ ପାଇଛି। ୧୯୯୩-୯୪ରେ ଏହି ସଂଖ୍ୟା ୨୧.୯ କୋଟି ଥିଲା। ସେହିପରି ୨୦୧୧-୧୨ରେ ଏହି ସଂଖ୍ୟା ୩୦..୪ କୋଟି ଥିଲା। ଏହି ସର୍ଭେରୁ ଜଣାପଡ଼ିଛି ଯେ ଗତ ୫ ବର୍ଷ ମଧ୍ୟରେ ଦେଶରେ ବହୁ କମ ପରିମାଣର ନିଯୁକ୍ତି ସୃଷ୍ଟି ହୋଇଛି।
ପ୍ରକାଶଯୋଗ୍ୟ ଯେ ସରକାରଙ୍କ ପକ୍ଷରୁ ଏହି ରିପୋର୍ଟ ଜାରି କରାଯାଇନାହିଁ। ଲୋକସଭା ନିର୍ବାଚନକୁ ଦୃଷ୍ଟିରେ ରଖି ସରକାର ଏହି ରିପୋର୍ଟକୁ ଅଟକାଇ ରଖିଛନ୍ତି।
