ନାଗପୁର: ବାଘୁଣୀଙ୍କୁ ଧରିବ ପରଫ୍ୟୁମ୍। ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ଗବେଷକମାନେ ଏହି ରହସ୍ୟ ସାମ୍ନାକୁ ଆଣିଛନ୍ତି। ପୁରୁଷଙ୍କ ପାଇଁ ଉଦ୍ଦିଷ୍ଟ କାଲଭିନ୍ କ୍ଲେନ୍ ନାମକ ଏହି ପରଫ୍ୟୁମ୍ର ସୁଗନ୍ଧ ପ୍ରତି ବାଘୁଣୀ ଓ ଅନ୍ୟ ବନ୍ୟପ୍ରାଣୀମାନେ ଆକୃଷ୍ଟ ହୋଇ ଚାଲି ଆସୁଥିବା ଦେଖାଯାଇଛି। ତେଣୁ କାଲ୍ଭିନ୍ କ୍ଲେନ୍କୁ ବ୍ୟବହାର କରି ସହଜରେ ବାଘୁଣୀକୁ ଯନ୍ତାରେ ବନ୍ଦୀ କରାଯାଇପାରିବ ବୋଲି ବନ୍ୟ ପ୍ରାଣୀ ବିଶେଷଜ୍ଞମାନେ କହିଛନ୍ତି। ଆମେରିକାର ବନ୍ୟପ୍ରାଣୀ ବିଭାଗ ଦ୍ୱାରା ଏହି ପଦ୍ଧତି ବହୁଳ ଭାବେ ବ୍ୟବହୃତ ହୋଇ ଆସୁଛି। ଭାରତର କେତେକାଞ୍ଚଳରେ ମଧ୍ୟ ଏହାର ପରୀକ୍ଷଣ ସଫଳ ହୋଇଛି। ୧୨୦ ମିଲିଲି ବିଶିଷ୍ଟ ବୋତଲର ମୂଲ୍ୟ ୩,୫୦୦ ଟଙ୍କାରୁ ୪,୫୦୦ ଟଙ୍କା ପଡ଼ୁଛି।
ଉଗାଣ୍ଡାର କିବେଲ୍ ନ୍ୟାଶ୍ନାଲ୍ ପାର୍କରେ ଏହି ପରଫ୍ୟୁମ୍ ପ୍ରତି ଆକର୍ଷିତ ହୋଇ ବାଘୁଣୀ ଚାଲି ଆସୁଥିବା ସିସିଟିଭି ଫୁଟେଜ୍ରୁ ଦେଖାଯାଇଛି। ଦୁଇ ବର୍ଷ ପୂର୍ବେ ବନ୍ୟପ୍ରାଣୀ ବିଶେଷଜ୍ଞ ଡ. ଏଚ୍ ଏସ୍ ପ୍ରୟାଗ କର୍ଣ୍ଣାଟକ ମାଣ୍ଡ୍ୟା ଜଙ୍ଗଲ ଓ ତାମିଲନଡ଼ୁରେ ଏହାର ସଫଳ ପରୀକ୍ଷଣ କରିଥିଲେ। ତେଲେଙ୍ଗାନାର କେତେକ ଅଞ୍ଚଳରେ ମଧ୍ୟର ଏହାର ସୁଫଳ ଦେଖିବାକୁ ମିଳିଛି।
