ପାକିସ୍ତାନକୁ ଆର୍ଥିକ ସହାୟତା ବନ୍ଦ କଲା ଆମେରିକା

ୱାଶିଂଟନ: ପାକିସ୍ତାନର ଆମେରିକୀୟ ଅନୁଦାନର ଶେଷ ଆଶା ମଉଳି ଯାଇଛି। ପାକିସ୍ତାନକୁ ସହାୟତା ପାଇଁ ମଞ୍ଜୁର ହୋଇଥିବା ୩୦୦ ନିୟୁତ ଆମେରିକୀୟ ଡଲାର ଅନୁଦାନ ରାଶିକୁ ଆମେରିକା ପକ୍ଷରୁ ପ୍ରତ୍ୟାହାର କରି ନିଆଯାଇଛି। ପୂର୍ବରୁ ଏ ସମ୍ପର୍କରେ ଆମେରିକା ପକ୍ଷରୁ ସୂଚନା ଦିଆଯାଇଥିବା ବେଳେ ଏବେ ଚୂଡ଼ାନ୍ତ ନିଷ୍ପତ୍ତି ଘୋଷଣା କରାଯାଇଛି।
ଆମେରିକା ପରରାଷ୍ଟ୍ର ବିଭାଗ ସଚିବ ମାଇକ୍‍ ପମ୍ପେଓ ଓ ବରିଷ୍ଠ ସେନା ଅଧିକାରୀ ଜେନେରାଲ୍‍ ଜୋଶେଫ୍‍ ଡନ୍‍ଫୋର୍ଡ ପାକିସ୍ତାନ ଗସ୍ତରେ ଆସି ସ୍ଥିତି ସମୀକ୍ଷା କରିବା ପରେ ଉପରୋକ୍ତ ନିଷ୍ପତ୍ତି ନିଆଯାଇଥିବା ଜଣାପଡ଼ିଛି। ଗତ ଏକ ଦଶନ୍ଧି ଧରି ପାକିସ୍ତାନରେ ଆମେରିକା ପକ୍ଷରୁ ଶିକ୍ଷା ଓ ତାଲିମ କାର୍ଯ୍ୟକ୍ରମ ଜାରି ରହିଥିବା ବେଳେ ଗତ ଅଗଷ୍ଟ ମାସରୁ ଆମେରିକା ପ୍ରଶାସନ ସେହି କାର୍ଯ୍ୟକ୍ରମକୁ କାଣ୍ଟଛାଣ୍ଟ କରିବା ଆରମ୍ଭ କରିଥିଲା। ଆମେରିକାର ଏହି ନିଷ୍ପତ୍ତି ଏବେ ଆର୍ଥିକ ଦୁରବସ୍ଥା ଦେଇ ଗତି କରୁଥିବା ପାକିସ୍ତାନ ପାଇଁ ଆହୁରି ଅଡ଼ୁଆ ସୃଷ୍ଟି କରିପାରେ ବୋଲି କୁହାଯାଉଛି।
ପାକିସ୍ତାନରେ ବୃଦ୍ଧି ପାଉଥିବା ଆତଙ୍କବାଦୀ କାର୍ଯ୍ୟକଳାପ ନିୟନ୍ତ୍ରଣ ପାଇଁ ଆମେରିକା ପାକିସ୍ତାନକୁ କୋଆଲିସନ୍‍ ସପୋର୍ଟ ଫଣ୍ଡସ୍‍ ନାମରେ ଆର୍ଥିକ ସହାୟତା ଯୋଗାଇ ଦେଇ ଆସୁଥିଲା। କିନ୍ତୁ ସେହି ଅର୍ଥର ଦୁରୁପଯୋଗ ହେଉଥିବା ଓ ଆତଙ୍କବାଦୀ କାର୍ଯ୍ୟକଳାପ ନିୟନ୍ତ୍ରଣରେ ପାକିସ୍ତାନ ସମ୍ପୂର୍ଣ୍ଣ ବିଫଳ ହୋଇଥିବା ପ୍ରମାଣ ମିଳିବା ପରେ ଆମେରିକା ସେନା ବାହିନୀ ପକ୍ଷରୁ ଉପରୋକ୍ତ କଠୋର ନିଷ୍ପତ୍ତି ନିଆଯାଇଛି। ପାକିସ୍ତାନ ନିଜ ମାଟିରେ ଆତଙ୍କବାଦୀ କାର୍ଯ୍ୟକଳାପକୁ ପ୍ରୋତ୍ସାହନ କରିବାରୁ ବିରତ ରହିବା ପାଇଁ ଘୋଷଣା କଲେ ମଧ୍ୟ ନିକଟ ଭବିଷ୍ୟତରେ ଆମେରିକା ତାର ଅନୁଦାନ ପ୍ରତ୍ୟାହାର ନିଷ୍ପତ୍ତିର ପୁନର୍ବିଚାର କରିବ ନାହିଁ ବୋଲି ଜଣାପଡ଼ିଛି। ଏହି ପାଣ୍ଠିକୁ ଆମେରିକା ଅନ୍ୟ ବିକାଶମୂଳକ କାର୍ଯ୍ୟକ୍ରମରେ ବିନିଯୋଗ କରିବ।