ପାଟନା: ଲାଲୁପ୍ରସାଦଙ୍କ ପୁଅ ତେଜପ୍ରତାପଙ୍କ ବିବାହ ଉତ୍ସବରେ ଆରଜେଡି କର୍ମୀଙ୍କ ଲଙ୍କାକାଣ୍ଡ ସମସ୍ତଙ୍କୁ ଚକିତ କରିଛି। ଉତ୍ସବରେ ଲାଲୁଙ୍କ ପରିବାରବର୍ଗଙ୍କ ପକ୍ଷରୁ କୌଣସି ଦଳୀୟ କର୍ମୀଙ୍କ ଡକାଯାଇ ନାହିଁ ବୋଲି କୁହାଯାଉଥିଲେ ମଧ୍ୟ ଉତ୍ସବ ସନ୍ଧ୍ୟାରେ ଶହଶହ ସଂଖ୍ୟାରେ ଦଳୀୟ କର୍ମୀ ଉପସ୍ଥିତ ହୋଇଥିଲେ। ଫଳରେ ଅତିଥିଙ୍କ ପାଇଁ ଖାଇବା ସ୍ଥାନରେ କ୍ରମଶଃ ଭିଡ଼ ବଡ଼ିବାକୁ ଲାଗିଥିଲା। ଖାଦ୍ୟ ପରିବେଶଣ କରୁଥିବା ବ୍ୟକ୍ତି ଭିଡ଼ ନିୟନ୍ତ୍ରଣ କରିବାରେ ବିଫଳ ହେବାରୁ ଶେଷରେ ଲୋକେ ଥାଳି, ଚାମଚ, କୋଲ୍ଡଡ୍ରିକ୍ସ, ଆଇସକ୍ରିମ ପରି ସାମଗ୍ରୀ ଘରକୁ ବୋହି ନେବାର ଦୃଶ୍ୟ ଦେଖିବାକୁ ମିଳିଥିଲା। ପରିସ୍ଥିତିକୁ ଶାନ୍ତ କରିବାକୁ ସେଠାରେ ପୁଲିସ ମୁତୟନ ଥିଲେ ମଧ୍ୟ ସେମାନଙ୍କ ହାତରୁ ସାମଗ୍ରୀ ଛଡ଼େଇ ନେବାର ଦୃଶ୍ୟ ମଧ୍ୟ ଦେଖିବାକୁ ମିଳିଥିଲା। ଏପରିକି ଆମନ୍ତ୍ରିତ ଅତିଥିଙ୍କ ମଧ୍ୟରେ ଭିଆଇପି ଓ ସାଧାରଣ ଅତିଥିଙ୍କ ପାଇଁ ହୋଇଥିବା ପେଣ୍ଡାଲକୁ ଉପସ୍ଥିତ ଭିଡ଼ ଭାଙ୍ଗ ଦେଇଥିଲେ। ଅତିଥିଙ୍କ ପାଇଁ ଥିବା ଖାଦ୍ୟ ସାମଗ୍ରୀକୁ ନିଜେ ଥାଳିରେ ବାଢି ନେଇଯାଉ ଥିବା ଦୃଶ୍ୟ ଦେଖିବାକୁ ମିଳିଥିଲା। ଘଟଣାସ୍ଥଳରେ ଟେବୁଲ ଚୌକି ଭାଙ୍ଗିବା ସହ ଥାଳି ବାସନ ନେଇ ପଳାଇଥିଲେ ଲାଲୁଙ୍କ ସମର୍ଥକ। ସ୍ଥାନୀୟ ନେତାଙ୍କ ପକ୍ଷରୁ ସେମାନଙ୍କ ଘଉଡ଼ାଇବାକୁ ବ୍ୟର୍ଥ ଉଦ୍ୟମ କରାଯାଇ ଥିଲେ ମଧ୍ୟ ଅଳ୍ପ ସମୟ ମଧ୍ୟରେ ଭିଡ଼ ସମ୍ପୃକ୍ତ ଅଞ୍ଚଳକୁ ଧୂଳିସାତ୍ କରିଦେଇଥିଲେ।
