ଚେନ୍ନଇ : ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ଜୟଲଳିତାଙ୍କ ଡାକ୍ତରଖାନାରେ ଭର୍ତ୍ତି ପରଠାରୁ ମୃତ୍ୟୁ ପର୍ଯ୍ୟନ୍ତ ଆପୋଲୋର ସମସ୍ତ ସିସିଟିଭି କ୍ୟାମେରା ବନ୍ଦ ରହିଥିଲା ବୋଲି ଆପୋଲ ହସ୍ପିଟାଲର ଅଧ୍ୟକ୍ଷ ଡ ପ୍ରତାପ ସି ରେଡ୍ଡୀ ଗୁରୁବାର ପ୍ରକାଶ କରିଛନ୍ତି । ଜୟଲଳିତା ନିଶ୍ୱାସ ପ୍ରଶ୍ୱାସ ନେବାରେ କଷ୍ଟଅନୁଭବ କରିବା ସହ ସ୍ୱାସ୍ଥ୍ୟ ଅବସ୍ଥାରେ ଦ୍ରୁତ ଅବନତି ଘଟିବା ପରେ ୨୦୧୬ ସେପ୍ଟେମ୍ବର ୨୨ରେ ତାଙ୍କୁ ଆପୋଲୋ ହସ୍ପିଟାଲରେ ଭର୍ତ୍ତି କରାଯାଇଥିଲା । ଦୀର୍ଘ ୭୫ ଦିନର ଚିକିତ୍ସା ପରେ ୨୦୧୬ ଡିସେମ୍ବର ୪ରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଜୟଲଳିତାଙ୍କ ମୃତ୍ୟୁର ତଦନ୍ତ କରୁଥିବା ଜଷ୍ଟିସ୍ ଏ ଅରୁମୁଗସ୍ୱାମୀ କମିଶନଙ୍କ ନିକଟରେ ଡାକ୍ତରଖାନା କର୍ତ୍ତୃପକ୍ଷ ଆବଶ୍ୟକ କାଗଜପତ୍ର ଜମା କରିଛନ୍ତି ବୋଲି ଆପୋଲୋ ଆନ୍ତର୍ଜାତିକ କୋଲୋରେକ୍ଟାଲ ସମ୍ପାନରେ ସେ ସୂଚନା ଦେଇଛନ୍ତି । ଜୟଲଳିତା ଚିକିତ୍ସାଧୀନ ଥିବାବେଳେ ଡାକ୍ତରଖାନାର ସମସ୍ତ ସିସିଟିଭିକୁ ବନ୍ଦ କରିଦିଆଯାଇଥିଲା । ତେଣୁ ସିସିଟିଭି ଫୁଟେଜ କମିଶନଙ୍କୁ ଦିଆଯାଇନାହିଁ ବୋଲି ସେ କହିଛନ୍ତି । ଜୟଲଳିତାଙ୍କ ଭର୍ତ୍ତି ପରେ ଆପୋଲୋ ହସ୍ପିଟାଲର ଇଣ୍ଟେନସିଭ କେୟାର ୟୁନିଟର ୨୪ ଶଯ୍ୟା ବିଶିଷ୍ଟ ଆଇସିୟୁରୁ ରୋଗୀଙ୍କୁ ଅନ୍ୟ ଆଇସିୟୁକୁ ସ୍ଥାନାନ୍ତର କରାଯାଇଥିଲା । ଜୟଲଳିତା ଏକ ମାତ୍ର ରୋଗୀ ଭାବେ ଆଇସିୟୁରେ ଚିକିତ୍ସାଧୀନ ରହିଥିଲେ । ନିକଟ ସମ୍ପର୍କୀୟଙ୍କୁ ଛାଡ଼ି ଅନ୍ୟ କାହାକୁ ବି ଆଇସିୟୁକୁ ଭିତରକୁ ଯିବାକୁ ଦିଆଯାଉନଥିଲା । ଡାକ୍ତରଖାନା ସବୁଠୁ ଭଲ ସେବା ଯୋଗାଇଥିଲେ ବି ଦୁର୍ଭାଗ୍ୟ ବଶତଃ ତାଙ୍କୁ ରକ୍ଷା କରିପାରିନଥିଲା ବୋଲି ସେ କହିଛନ୍ତି।
