ଭୁବନେଶ୍ୱର: ଚଳିତ ବର୍ଷ ଏକମାତ୍ର ଓଡିଆ ଭାବେ ଜୁବିନ ଦାଶ ନ୍ୟୁୟର୍କର କଲମ୍ୱିଆ ବିଶ୍ୱବିଦ୍ୟାଳୟରେ ଏଲଏଲ.ଏମ୍ କରିବା ଫୁଲବ୍ରାଇଟ୍ ଫେଲୋସିପ୍ ପାଇଁ ଯୋଗ୍ୟ ବିବେଚିତ ହୋଇଛନ୍ତି । ଏହା ବିଶ୍ୱର ସବୁଠାରୁ ବଡ ଶିକ୍ଷାଗତ ବୃତ୍ତି ଭାବେ ପରିଗଣିତ ହୁଏ । ବିଶ୍ୱର ଦେଢ ଶହ ଦେଶର ମେଧାବୀ ଛାତ୍ର ଛାତ୍ରୀମାନେ ଏହି ଛାତ୍ରବୃତ୍ତି ପାଇଁ ପ୍ରତିଦ୍ୱନ୍ଦିତା କରିଥାଆନ୍ତି ।
ଏହି ଫେଲୋସିପ୍ ବିଭିନ୍ନ ଶିକ୍ଷା କ୍ଷେତ୍ରରେ ମେଧାବୀ ଛାତ୍ରଛାତ୍ରୀଙ୍କୁ ପ୍ରଦାନ କରାଯାଇଥାଏ । ଏମାନେ ଆମେରିକରେ ସ୍ନାତକୋତ୍ତର ଶିକ୍ଷା ପାଇଁ ଯୋଗ୍ୟ ବିବେଚିତ ହୋଇଥାଆନ୍ତି । ଏହି ଶିକ୍ଷାଲାଭ ପରେ ସମାଜର ମୂଳସ୍ରୋତରେ ସାମିଲ ହୋଇ ଉନ୍ନତି ଏବଂ ନେତୃତ୍ୱ ନେବାର ଦକ୍ଷତା ବୃଦ୍ଧି ହୋଇଥାଏ । ଫୁଲବ୍ରାଇଟ୍ ଫେଲୋସିପ୍ରେ ଅଧ୍ୟୟନ କରିଥିବା ଅନେକ ଛାତ୍ରଛାତ୍ରୀ ଭବିଷ୍ୟତରେ ନେତୃତ୍ୱ ନେବା ସହ ସମାଜରେ ବିଭିନ୍ନ ପରିବର୍ତ୍ତନ ଆଣିଛନ୍ତି ଏବଂ ନୋବେଲ ପରି ସମ୍ମାନଜନକ ପୁରସ୍କାର ପାଇଛନ୍ତି ।
ବିଶ୍ୱର ମେଧାବୀ ଛାତ୍ରଛାତ୍ରୀଙ୍କ ସହ ଜୁବିନ୍ଙ୍କର ପ୍ରତିଦ୍ୱନ୍ଦିତା ହୋଇଥିଲା । ସେ ସଫଳତାର ସହ ଏହାର ଚୟନ ପ୍ରକ୍ରିୟାରେ ଉତ୍ତୀର୍ଣ୍ଣ ହୋଇଛନ୍ତି । ସେ ଅନେକ ଜାତୀୟ ଏବଂ ଅନ୍ତର୍ଜାତୀୟସ୍ତରେ ସମ୍ମାନ ଲାଭ କରିଛନ୍ତି । ୨୦୧୪ରେ ଓ୍ଵାଶିଂଟନ ଡିସି ହେସପ୍ ମୁଟ୍ କୋର୍ଟ ପ୍ରତିଯୋଗିତାରେ ଭାରତର ପ୍ରତିନିଧିତ୍ଵ କରିଥିଲେ। ୨୦୧୬ରେ ତତ୍କାଳୀନ ପ୍ରଧାନ ବିଚାରପତି ଟିଏସ ଠାକୁରଙ୍କଠୁ ସେ ସ୍ଵର୍ଣ୍ଣ ପଦକ ପାଇଥିଲେ ।
ଜୁବିନଙ୍କ ପିତା ଡ. ଦେବୀ ପ୍ରସାଦ ଦାଶ ରାଜସ୍ଵ ଗୁଇନ୍ଦା ନିର୍ଦ୍ଦେଶାଳୟ(ଡିଆର୍ଆଇ)ର ମୁଖ୍ୟ ମହାନିର୍ଦ୍ଦେଶକ ପଦବୀରେ ଅଧିଷ୍ଠିତ ଥିଲେ, ତାଙ୍କ ମାଆ ସୋନାଲି ଦାଶ ଜଣେ ଶିକ୍ଷାବିତ୍ ।
