ସମାଜ ଡିଜିଟାଲ ଡେସ୍କ: ମୋବାଇଲ୍ ରିଚାର୍ଜ ପରେ ଏବେ ଅନ୍ଲାଇନ୍ରେ ଖାଦ୍ୟ ଅର୍ଡର କରିବା ମହଙ୍ଗା ହୋଇଛି। ଅନ୍ଲାଇନ୍ ଖାଦ୍ୟ ଡେଲିଭରୀ ଆପ୍ ଜୋମାଟୋ ଓ ସ୍ଵିଗି ଦିଲ୍ଲୀ ଏବଂ ବେଙ୍ଗାଲୁରୁରେ ଏହାର ଫି’ ୨୦ ପ୍ରତିଶତ ବଢାଇବା ନେଇ ଘୋଷଣା କରିଛି। ଏହାପୂର୍ବରୁ ଟେଲିକମ୍ ଅପରେଟର ଜିଓ, ଏୟାରଟେଲ ଏବଂ ଭୋଡାଫୋନ୍-ଆଇଡିଆ ଏହାର ରିଚାର୍ଜ ପ୍ଲାନ୍ ବୃଦ୍ଧି କରିଥିଲେ। ଏଥିରେ ମଧ୍ୟ ପ୍ରାୟ ୨୦ ପ୍ରତିଶତ ବୃଦ୍ଧି କରାଯାଇଛି।
Zomato ଓ Swiggy ଗ୍ରାହକଙ୍କଠାରୁ ପ୍ରତ୍ୟେକ ଅର୍ଡରରେ ଦିଲ୍ଲୀ ଓ ବେଙ୍ଗାଲୁରୁରେ ୬ ଟଙ୍କା ପ୍ଲାଟଫର୍ମ ଫି’ ଆଦାୟ କରାଯିବ, ଯାହା ପୂର୍ବରୁ ୫ ଟଙ୍କା ଥିଲା। ସେହିପରି ବେଙ୍ଗାଲୁରୁରେ ସ୍ଵିଗି ପ୍ରଥମେ ୭ ଟଙ୍କା ପ୍ଲାଟଫର୍ମ ଫି’ ଚାର୍ଜ କରିବାର ଟିଜର ରିଲିଜ କରିଥିଲା, କିନ୍ତୁ ଗ୍ରାହକଙ୍କ ଅସନ୍ତୋଷ ପରେ ସ୍ଵିଗି ପୂର୍ବ ଭଳି ୬ ଟଙ୍କା ଫି’ ଆଦାୟ କରିଥିଲା।
ଯେମିତି ଜିଓ ଏବଂ ଏୟାରଟେଲ ଟେିଲିକମ୍ ମାର୍କେଟକୁ ସମ୍ପୂର୍ଣ୍ଣ କବ୍ଜା କରିଛି, ଠିକ୍ ସେହିପରି ସ୍ଵିଗି ଓ ଜୋମାଟୋର ଅନ୍ଲାଇନ୍ ଫୁଡ୍ ଅର୍ଡର ସେକ୍ଟରରେ ସମ୍ପୂର୍ଣ୍ଣ ନିୟନ୍ତ୍ରଣ ରହିଛି। ଜୋମାଟୋର ମାର୍କେଟ ଶେୟାର ପ୍ରାୟ ୫୫ ପ୍ରତିଶତ ଥିବାବେଳେ ସ୍ଵିଗିର ମାର୍କେଟ ଶେୟାର ପ୍ରାୟ ୪୪ ପ୍ରତିଶତ ରହିଛି। ଅର୍ଥାତ୍ ଅନଲାଇନ୍ ଫୁଡ୍ ଅର୍ଡର ମାର୍କେଟରେ ପ୍ରାୟ ୯୯ ପ୍ରତିଶତ ଏହି ଦୁଇଟି କମ୍ପାନୀର କବ୍ଜା ରହିଛି।
