ବୁଏନ୍ସ ଏରିଜ୍ : ଏଠାରେ ଖେଳାଯାଉଥିବା ଯୁବ ଅଲିମ୍ପିକ୍ସର ହକି ଫାଇନାଲରେ ଉଭୟ ଭାରତୀୟ ପୁରୁଷ ଓ ମହିଳା ଦଳ ପ୍ରବେଶ କରିଛନ୍ତି।
ପୁରୁଷ ବିଭାଗ ସେମିଫାଇନାଲରେ ଭାରତ ୩-୧ ଗୋଲ୍ରେ ଆୟୋଜକ ଆର୍ଜେଣ୍ଟିନାକୁ ପରାସ୍ତ କରିଥିବା ବେଳେ ମହିଳା ବିଭାଗ ସେମିରେ ଚୀନ୍କୁ ୩-୦ ଗୋଲ୍ରେ ପରାସ୍ତ କରିଥିଲା। ଫାଇନାଲରେ ଭାରତୀୟ ପୁରୁଷ ଦଳର ମୁକାବିଲା ମାଲେସିଆ ଓ ମହିଳା ଦଳର ମୁକାବିଲା ଆର୍ଜେଣ୍ଟିନା ସହ ହେବ। ପୁରୁଷ ବିଭାଗ ସେମିଫାଇନାଲରେ ଭାରତୀୟ ଦଳ ତରଫରୁ ଖେଳର ୩ୟ ମିନିଟ୍ରେ ରାହୁଲ କୁମାର ପ୍ରଥମ ଗୋଲ୍ ସ୍କୋର କରିଥିଲେ। ତେବେ ୪ ମିିନିଟ୍ରେ ଆର୍ଜେଣ୍ଟିନାର ଅଧିନାୟକ ଫାକୁଣ୍ଡୋ ଜରାଟା ଗୋଲ୍ଟିକୁ ପରିଶୋଧ କରି ଖେଳକୁ ସମାନ ସ୍ତରକୁ ଆଣିଥିଲେ। ଏହାପରେ ଉଭୟ ଦଳ ଗୋଲ୍ ସ୍କୋର କରିବାର କେତେକ ସୁଯୋଗ ସୃଷ୍ଟି କରିଥିଲେ ମଧ୍ୟ ସଫଳତା ପାଇନଥିଲେ। ଖେଳର ୧୨ ମିନଟ୍ରେ ସୁଦୀପ ଚିରମାକୋ ଭାରତ ତରଫରୁ ଦ୍ୱିତୀୟ ଗୋଲ୍ ସ୍କୋର କରିଥିଲେ। ଏହାର ୬ ମିନିଟ୍ ଅର୍ଥାତ ଖେଳର ୧୮ ମିିନିଟ୍ରେ ସୁଦୀପ ପୁନର୍ବାର ଗୋଲ୍ ସ୍କୋର କରି ଦଳକୁ ୩-୧ରେ ଅଗ୍ରଣୀ କରାଇଥିଲେ। ଗୋଲ୍ ପରିଶୋଧ କରିବାକୁ ଆର୍ଜେଣ୍ଟିନା ବହୁ ଚେଷ୍ଟା କରିଥିଲେ ମଧ୍ୟ ସଫଳ ହୋଇ ପାରିନଥିଲା। ମହିଳା ସେମିଫାଇନାଲରେ ଖେଳର ୫୨ ସେକେଣ୍ଡରେ ଭାରତ ତରଫରୁ ମୁମତାଜ ଖାନ୍ ଗୋଲ ସ୍କୋର କରି ଦଳକୁ ଅଗ୍ରଣୀ କରାଇଥିଲେ। ୫ମ ମିନିଟ୍ରେ ଦଳ ତରଫରୁ ରୀତ୍ ଓ ୧୩ ମିନିଟ୍ରେ ଲାଲ୍ରେମସିଆମି ଗୋଲ୍ ସ୍କୋର କରି ଦଳକୁ ସହଜ ବିଜୟ ପ୍ରଦାନ କରିଥିଲେ।
