କରୋନା: ୨୧ ହଜାର ଟପିଲା ମୃତ୍ୟୁ ସଂଖ୍ୟା, ୪.୭ ଲକ୍ଷ ଆକ୍ରାନ୍ତ

ନୂଆଦିଲ୍ଲୀ: ମହାମାରୀ କରୋନା ଭୂତାଣୁ ଯୋଗୁ ସାରା ବିଶ୍ଵରେ ମୃତ୍ୟୁ ସଂଖ୍ୟା ୨୧ ହଜାର ୨୮୭ରେ ପହଞ୍ଚିଛି। ଏହା ମଧ୍ୟରୁ ଇଟାଲୀରେ ସର୍ବାଧିକ ୭୫୦୩ ଜଣ ପ୍ରାଣ ହରାଇଛନ୍ତି। ସେହିପରି ସାରା ବିଶ୍ଵରେ ୪ ଲକ୍ଷ ୭୧ ହଜାର ୪୦୭ ଜଣ ଆକ୍ରାନ୍ତ ହୋଇଛନ୍ତି। ଭାରତରେ ଆକ୍ରାନ୍ତଙ୍କ ସଂଖ୍ୟା ଗୁରୁବାର ସୁଦ୍ଧା ୬୪୯ରେ ପହଞ୍ଚିଥିବାବେଳେ ୧୩ ଜଣଙ୍କର ମୃତ୍ୟୁ ଘଟିଛି। ଜାମ୍ମୁ-କାଶ୍ମୀରରେ ପ୍ରଥମ କରି ଜଣେ ଆକ୍ରାନ୍ତଙ୍କ ମୃତ୍ୟୁ ହୋଇଛି।

ଅନ୍ୟପଟେ ଇଟାଲୀ, ସ୍ପେନ, ଇରାନ, ଫ୍ରାନ୍ସ, ଆମେରିକା, ବ୍ରିଟେନରେ କରୋନା ଭୂତାଣୁ ଭୟଙ୍କର ପରିସ୍ଥିତି ସୃଷ୍ଟି କରିଛି। ସ୍ପେନରେ ମୃତ୍ୟୁ ସଂଖ୍ୟା ଚୀନକୁ ଅତିକ୍ରମ କରିଛି। ଚୀନରେ ୩୧୬୩ ଜଣଙ୍କ ମୃତ୍ୟୁ ଘଟିଥିବାବେଳେ ସ୍ପେନରେ ଏହା ୩୬୪୭ ଛୁଇଁଛି। ସେହିପରି ଇରାନରେ ୨୦୭୭ ଏବଂ ଫ୍ରାନ୍ସରେ ୧୩୩୧ ଜଣଙ୍କ ମୃତ୍ୟୁ ଘଟିଛି।