ଆଠଗଡ : ବ୍ରହ୍ମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅଧିନ ମେଘା ସେକ୍ଟରର ଗାଁ କଲ୍ୟାଣ ସମିତି ସମୂହ ଆନୁକୁଲ୍ୟରେ ସ୍ଥାନୀୟ ରାଜନଗର ପଞ୍ଚାୟତର ବେତଖୋଲି ଗ୍ରାମରେ ଗୁରୁବାର ବିଶ୍ୱ ବୃକକ୍ ଦିବସ ଅବସରରେ ଜନସଚେତନତା ସୃଷ୍ଟି କରାଯାଇଥିଲା। ବ୍ରହ୍ମପୁର ସିଏଚସି ଅଧିକ୍ଷକ ଡାକ୍ତର ଦିଲ୍ଲୀପ ଦାସଙ୍କ ନିର୍ଦ୍ଦେଶକ୍ରମେ ମେଘା ସେକ୍ଟରର ବରିଷ୍ଠ ବହୁମୁଖୀ ସ୍ୱାସ୍ଥ୍ୟ ପରିଦର୍ଶକ ମହମ୍ମଦ ଅସଲମ ଆୟୋଜିତ କାର୍ଯ୍ୟକ୍ରମରେ ସଂଯୋଜନା କରି ବୃକକ୍ ଜନିତ ରୋଗ ଅଣସଂକ୍ରାମକ ବୋଲି କହିଥିଲେ। ବୃକକ୍ର ମୁଖ୍ୟ କାର୍ଯ୍ୟ ପରିଶ୍ରା ପ୍ରସ୍ତୁତିକରଣ ଓ ପରିଶ୍ରା ମାଧ୍ୟମରେ ଶରୀରରୁ ଅଦରକାରୀ ଦ୍ରବ୍ୟ ଓ ଦୂଷିତ ବର୍ଜ୍ୟବସ୍ତୁ ନିଷ୍କାସନ କରିବା ସହିତ ଏହା ରକ୍ତର ସାନ୍ଧ୍ରତା ତଥା ସୋଡିୟମ୍ ଓ ପଟାସିୟମ୍ର ଆନୁପାତିକ ସଂରକ୍ଷଣ ହୋଇଥାଏ। ବୃକକ୍ ଜନିତ ରୋଗର ଲକ୍ଷଣ ପରିଶ୍ରାରେ ଅନିୟମିତତା, ପୋଡାଜଳା, ଯନ୍ତ୍ରଣା ଓ ପାଦଫୁଲିବା ପରିଲକ୍ଷିତ ହେଲେ ତୁରନ୍ତ ଡାକ୍ତରଖାନାଯାଇ ବିଶେଷଜ୍ଞ ଡାକ୍ତରଙ୍କ ପରାମର୍ଶ ଓ ଚିକିତ୍ସା ଗ୍ରହଣ କରିବା ଜରୁରୀ ବୋଲି ଶ୍ରୀ ଅସଲମ ପ୍ରକାଶ କରିଥିଲେ। ଏହି କାର୍ଯ୍ୟକ୍ରମରେ ରାଜନଗର ସରପଞ୍ଚ ମହେନ୍ଦ୍ର ପରିଡା, ଗାଁ କଲ୍ୟାଣ ସମିତି ଅଧ୍ୟକ୍ଷ ଲକ୍ଷ୍ମୀଧର ନାୟକ, ସ୍ୱାସ୍ଥ୍ୟକର୍ମୀ ନମିତା ପ୍ରତାପ, ଅମରେନ୍ଦ୍ର ପ୍ରଧାନ, ଅଙ୍ଗନବାଡିକର୍ମୀ ମଧୁସ୍ମିତା ପ୍ରଧାନ, ମାମି ନାୟକ, ଆଶାକର୍ମୀ ଅମିତା ସାହୁଙ୍କ ସମେତ ଗାଁ କଲ୍ୟାଣ ସମିତିର ସଭ୍ୟମାନେ ଯୋଗଦେଇଥିଲେ। ଜନସଚେତନତା ପାଇଁ ଏକ ଶୋଭାଯାତ୍ରା ଗ୍ରାମ ପରିକ୍ରମା କରିଥିଲା।
