ନୂଆଦିଲ୍ଲୀ: ବିଶ୍ୱ ସମୁଦାୟ ଏକତ୍ରିତ ହୋଇ ଆତଙ୍କବାଦ ବିରୁଦ୍ଧରେ ସଂଗ୍ରାମ କରିବାକୁ ଆଗେଇ ଆସିବା ଉଚିତ। ନୂଆଦିଲ୍ଲୀରେ ଡକ୍ଟର ଏ.ପି.ଜେ. ଅବଦୁଲ୍ କଲାମ ତୃତୀୟ ଉଦ୍ଭାବନ ଓ ପ୍ରଶାସନ ସମ୍ମିଳନୀରେ ଉଦ୍ବୋଧନ ଦେଇ ଉପରାଷ୍ଟ୍ରପତି ଏମ. ଭେଙ୍କିଆ ନାଇଡୁ କହିଛନ୍ତି, ଆତଙ୍କବାଦକୁ ସମ୍ମିଳିତ ଓ ନିରନ୍ତର ଉଦ୍ୟମ ଜରିଆରେ ଦମନ କରାଯିବା ଆବଶ୍ୟକ। ସେ କହିଛନ୍ତି, ରାଜନୈତିକ ଦଳଗୁଡ଼ିକ ସମସ୍ୱରରେ ସନ୍ତ୍ରାସବାଦ ବିରୁଦ୍ଧରେ ସ୍ୱର ଉତ୍ତୋଳନ କରିବା ସଙ୍ଗେ ସଙ୍ଗେ ଦେଶ ଓ ସଶସ୍ତ୍ର ବାହିନୀ ପ୍ରତି ସମର୍ଥନ ଜଣାଇବାର ଆବଶ୍ୟକତା ରହିଛି। ଭାରତର ବିକାଶ ପାଇଁ ଯୁବପିଢ଼ି ନୂତନ ଚିନ୍ତାଧାରା ସହ ଅନୁସନ୍ଧାନରେ ବ୍ରତୀ ହେବାକୁ ଉପରାଷ୍ଟ୍ରପତି ଆହ୍ୱାନ ଦେଇଛନ୍ତି। ସହର ଓ ଗ୍ରାମାଞ୍ଚଳ ମଧ୍ୟରେ ବିଭେଦ ଦୂର କରିବା ଉଦ୍ଦେଶ୍ୟରେ ଗ୍ରାମୀଣ ଭାରତର ବିକାଶ ଜରୁରୀ ବୋଲି ସେ କହିଛନ୍ତି। ସେ କହିଛନ୍ତି, ପାରଦର୍ଶୀ, ଉତ୍ତରଦାୟୀ ଏବଂ ଭ୍ରଷ୍ଟାଚାରମୂକ୍ତ ଶାସନ ଭାରତକୁ ମହାଶକ୍ତିରେ ରୂପାନ୍ତରିତ କରିପାରିବ।
