ବେଜିଂ : ଚୀନର ଏକାଧିକ ସହର ୨୧୨୦ ମସିହା ସୁଦ୍ଧା ସମୁଦ୍ରରେ ଲୀନ ହେବା ଆଶଙ୍କା ସୃଷ୍ଟି ହୋଇଛି। ଫଳରେ ଏହି ଅଞ୍ଚଳରେ ରହୁଥିବା ଚୀନ ଜନସଂଖ୍ୟାର ଏକ ତୃତୀୟାଂଶଙ୍କ ପ୍ରତି ବିପଦ ସୃଷ୍ଟି ହେବାକୁ ଯାଉଛି। ଉପଗ୍ରହ ମାଧ୍ୟମରେ ବିଭିନ୍ନ ସହର ସମ୍ପର୍କରେ ସେଠାକାର ସରକାରଙ୍କ ତରଫରୁ ଅନୁଧ୍ୟାନ କରାଯାଇଥିଲା। ଚୀନ୍ର ୮୨ଟି ସହରକୁ ନେଇ ଏହି ଅନୁଧ୍ୟାନ କରାଯାଇଥିଲା। ଏଥିରେ ସାଂଘାଇ ଓ ବେଜିଂ ଭଳି ସହର ରହିଥିଲା। ଅନୁଧ୍ୟାନରୁ ମିଳିଥିବା ତଥ୍ୟ ଅନୁଯାୟୀ ବିଭିନ୍ନ ସହରର ୪୫% ଭୂମି ତଳକୁ ଦବୁଛି। ସେଥିମଧ୍ୟରୁ ୧୬% ବର୍ଷକୁ ୧୦ ମିଲିମିଟର ପର୍ଯ୍ୟନ୍ତ ତଳକୁ ଦବୁଛି। ଫଳରେ ୨୧୨୦ ବେଳକୁ ଏକାଧିକ ସହର ସମୁଦ୍ରରେ ଲୀନ ହେବାର ଆଶଙ୍କା ସୃଷ୍ଟି ହୋଇଛି। ବେଜିଂ ଓ ଟିଆନଜିନ୍ ସହର ମଧ୍ୟ ବିପଦ ରହିଥିବା ଅନୁଧ୍ୟାନରୁ ସ୍ପଷ୍ଟ ହୋଇଛି। ଏକାଧିକ ସହର ସମୁଦ୍ରରେ ଲୀନ ହେବାର ଆଶଙ୍କା ରହିଥିବାରୁ ଏଠାରେ ବାସ କରୁଥିବା ୨୭୦ ନିୟୁତ ଜନସାଧାରଣଙ୍କ ଜୀବନ ପ୍ରତି ବିପଦ ସୃଷ୍ଟି ହେବ ବୋଲି ଆକଳନ କରାଯାଇଛି। ଜଳବାୟୁ ପରିବର୍ତ୍ତନ ସହ ସମୁଦ୍ର ଜଳସ୍ତର ବୃଦ୍ଧି ପାଉଥିବାରୁ ଏପରି ପରିସ୍ଥିତି ସୃଷ୍ଟି ହେବାକୁ ଯାଉଥିବା ଅନୁଧ୍ୟାନ ରିପୋର୍ଟରେ ଦର୍ଶାଯାଇଛି। ଗତ ଶତାବ୍ଦୀରେ ସାଂଘାଇ ସହର ୩ ମିଟର ପର୍ଯ୍ୟନ୍ତ ତଳକୁ ଦବିଥିବା ଅନୁଧ୍ୟାନରୁ ଜଣାପଡ଼ିଛି। ଭିତ୍ତିଭୂମି ବିକାଶ ପାଇଁ ମାତ୍ରାଧିକ ନିର୍ମାଣ କାର୍ଯ୍ୟ, କଳକାରଖାନାର ସଂଖ୍ୟା ବୃଦ୍ଧି ଯୋଗୁଁ ଭୂପୃଷ୍ଠ ତଳକୁ ଦବୁଥିବା ବେଳେ ଏହାର ମୁକାବିଲା ପାଇଁ ବର୍ତ୍ତମାନ ଠାରୁ ଉପଯୁକ୍ତ କାର୍ଯ୍ୟପନ୍ଥା ଗ୍ରହଣ କରାଯିବା ଆବଶ୍ୟକ ବୋଲି ରିପୋର୍ଟରେ ଉଲ୍ଲେଖ କରାଯାଇଛି।
Comments are closed.