ଡେସ୍କ: ହ୍ବାଟ୍ସଆପ୍ ନିଜ ୟୁଜରଙ୍କ ବ୍ୟକ୍ତିଗତ ତଥା ଗୋପନୀୟ ତଥ୍ୟକୁ ସୁରକ୍ଷିତ ରଖିବା ପାଇଁ ସମୟ ସମୟରେ ଅପ୍ଡେଟ୍ ଓ ନୂଆ ଫିଚର୍ମାନ ଆଣିଥାଏ। ଏହିଭଳି ଏକ ଫିଚର୍ ହେଉଛି ଚାଟ୍ ଲକ୍ ଫିଚର୍, ଯାହାକୁ ଏବେ ଅପ୍ଡେଟ୍ କରିଦିଆଯାଇଛି। ହ୍ବାଟ୍ସଆପ୍କୁ ଭିନ୍ନ ଭିନ୍ନ ଡିଭାଇସ୍ରେ ବ୍ୟବହାର କରୁଥିବା ୟୁଜରଙ୍କ ପାଇଁ ଏହା ବେଶ୍ ଉପଯୋଗୀ।
ହ୍ବାଟ୍ସଆପ୍ରେ ଚାଟ୍ ଲକ୍ ନାମକ ଏକ ଫିଚର ଅଛି, ଯାହା ଆପଣଙ୍କ ସ୍ମାର୍ଟଫୋନରେ ହ୍ବାଟ୍ସଆପ୍ ଚାଟ୍ ଲକ୍ କରିବାରେ ସାହାଯ୍ୟ କରିଥାଏ। ଏହାଦ୍ବାରା ପାସ୍ୱର୍ଡ ଜାଣିଥିଲେ ମଧ୍ୟ କେହି ଆପଣଙ୍କ ହ୍ବାଟ୍ସଆପ୍ ଚାଟ୍ ପଢିପାରିବେ ନାହିଁ। ଯଦି ଆପଣ ମଧ୍ୟ ଚାହୁଁଛନ୍ତି କି, ଆପଣଙ୍କ ହ୍ବାଟ୍ସଆପ୍ ଚାଟ୍ କେହି ନ ପଢିପାରନ୍ତୁ ଏବଂ ଆପଣଙ୍କ ବ୍ୟକ୍ତିଗତ ତଥା ଗୋପନୀୟ ତଥ୍ୟ ସୁରକ୍ଷିତ ରହୁ, ତେବେ ଏଥିପାଇଁ ହ୍ବାଟ୍ସଆପ୍ ଚାଟ୍ ଲକ୍ ସେଟିଙ୍ଗ୍ ଆକ୍ଟିଭେଟ୍ କରିବାକୁ ପଡ଼ିବ।
ଏହି ଫିଚରକୁ ଏବେ ମୋବାଇଲ୍ ଡିଭାଇସ୍ ସହ ହ୍ବାଟ୍ସଆପ୍ ଲିଙ୍କ୍ଡ ଡିଭାଇସ୍ରେ ମଧ୍ୟ ଉପଲବ୍ଧ କରାଯାଇଛି। ହ୍ବାଟ୍ସଆପ୍ର ମୁଖ୍ୟ ଡିଭାଇସ୍ରେ ଚାଟ୍ ଲକ୍ କରିବା ପରେ ବାକି ସବୁ ଡିଭାଇସ୍ରେ ଚାଟ୍ ଲକ୍ ଲାଗିଯିବ। ଏପର୍ଯ୍ୟନ୍ତ ହ୍ବାଟ୍ସଆପ୍ ବ୍ୟବହାରକାରୀ ନିଜ ମୁଖ୍ୟ ଡିଭାଇସ୍ରେ ତ ଚାଟ୍ ଲକ୍ କରି ଦେଉଥିଲେ, ହେଲେ ଅନ୍ୟ ଡିଭାଇସ୍ ମାଧ୍ୟମରେ ହ୍ବାଟ୍ସଆପ୍ ତଥ୍ୟ ଲିକ୍ ହେବାର ଭୟ ରହୁଥିଲା କିନ୍ତୁ ଏବେ ଏହି ଭୟ ମଧ୍ୟ ଦୂର ହୋଇଯିବ।
ହ୍ବାଟ୍ସଆପ୍ର ନୂଆ ଚାଟ୍ ଲକ୍ ଫିଚର୍ର ବିଟା ଭର୍ସନ ବର୍ତ୍ତମାନ ଆଣ୍ଡ୍ରଏଡ୍ ଡିଭାଇସ୍ ତଥା ୟୁଜରଙ୍କ ପାଇଁ ଲାଗୁ କରାଯାଇଛି। ଖୁବଶୀଘ୍ର ଏହାକୁ ବାକି ଡିଭାଇସ୍ ପାଇଁ ମଧ୍ୟ ଲଞ୍ଚ୍ କରାଯିବ।
