ଲିଡ୍ସ, ୪ା୭: ବିଜୟ ସହ ଚଳିତ ବିଶ୍ବକପ୍ରେ ଅଭିଯାନ ଆରମ୍ଭ କରିଥିବା ୱେଷ୍ଟଇଣ୍ଡିଜ୍ ଅନ୍ତିମ ଲିଗ୍ ମ୍ୟାଚ୍ରେ ମଧ୍ୟ ବିଜୟୀ ହୋଇଛି। ଗୁରୁବାର ୱେଷ୍ଟଇଣ୍ଡିଜ୍ ୨୩ ରନ୍ରେ ଆଫ୍ଗାନିସ୍ତାନକୁ ପରାସ୍ତ କରିଛି। ପ୍ରଥମେ ବ୍ୟାଟିଂକରି ୱେଷ୍ଟଇଣ୍ଡିଜ୍ ୬ ୱିକେଟରେ ୩୧୧ ରନ୍ କରିଥିଲା। ଏଭିନ୍ ଲୁଇସ୍, ସାଇ ହୋପ୍ ଓ ନିକୋଲାସ୍ ପୁରନ୍ଙ୍କ ଅର୍ଦ୍ଧଶତକ ବଳରେ ୱେଷ୍ଟଇଣ୍ଡିଜ୍ ଏହି ସ୍କୋର୍ କରିଥିଲା। ପରେ ଆଫ୍ଗାନିସ୍ତାନ ଶେଷ ବଲ୍ରେ ୨୮୮ ରନ୍କରି ଅଲ୍ଆଉଟ ହୋଇ ଯାଇଥିଲା। ୯ମ ମ୍ୟାଚ୍ରେ ୨ୟ ବିଜୟ ପରେ ୫ ପଏଣ୍ଟ ସହ ୱେଷ୍ଟଇଣ୍ଡିଜ୍ ବିଶ୍ବକପ୍ରୁ ବିଦାୟ ନେଇଛି। ୯ମ ମ୍ୟାଚ୍ରେ ଆଫ୍ଗାନିସ୍ତାନ ୯ମ ପରାଜୟ ଭୋଗିଛି।
୩୧୨ ରନ୍ ଲକ୍ଷ୍ୟରେ ଆଫ୍ଗାନିସ୍ତାନ ସହଳ ଅଧିନାୟକ ଗୁଲ୍ବାଦିନ ନାଇବ୍ (୫)ଙ୍କ ୱିକେଟ ହରାଇଥିଲା। ତେବେ ରହ୍ମତ ଶାହା ଓ ଇକ୍ରାମ୍ ଆଲିଖିଲ ୨ୟ ୱିକେଟ ପାଇଁ ଲଢ଼ୁଆ ବ୍ୟାଟିଂକରି ୧୩୩ ରନ୍ ଯୋଗ କରିଥିଲେ। ରହ୍ମତ ୭୮ ବଲ୍ରୁ ୧୦ଟି ଚୌକା ସହ ୬୨ ଏବଂ ଇକ୍ରାମ୍ ୯୩ ବଲ୍ରୁ ୮ଟି ଚୌକା ସହ ୮୬ ରନ୍ କରିଥିଲେ। ପରେ ନଜିବୁଲ୍ଲା ଜାଦ୍ରାନ୍ ୩୮ ବଲ୍ରୁ ଗୋଟିଏ ଲେଖାଏଁ ଛକା ଓ ଚୌକା ସହ ୩୧ ରନ୍ କରିଥିଲେ। ମହମ୍ମଦ ନବି ୨ ରନ୍କରି ଆଉଟ ହୋଇଥିଲେ। ପରେ ଅସ୍ଗର ଆଫ୍ଗାନ ୩୨ ବଲ୍ରୁ ଗୋଟିଏ ଛକା ଓ ୪ଟି ଚୌକା ସହ ୪୦ ରନ୍ କରିଥିଲେ। ପରେ ଅନ୍ୟ ସମସ୍ତେ ବିଫଳ ହୋଇଥିଲେ। କାର୍ଲୋସ ବ୍ରାଥ୍ୱେଟ୍ ୪ଟି ଓ କିମାର ରୋଚ୍ ୩ଟି ୱିକେଟ ନେଇଥିଲେ।
ୱେଷ୍ଟଇଣ୍ଡିଜ୍ ଟସ୍ ଜିତି ବ୍ୟାଟିଂର ନିଷ୍ପତ୍ତି ନେଇଥିଲା। ବିସ୍ଫୋରକ ବ୍ୟାଟ୍ସମ୍ୟାନ୍ କ୍ରିସ୍ ଗେଲ୍ ପୁଣିଥରେ ଧିମାଗତିରେ ଇନିଂସ ଆରମ୍ଭ କରିଥିବା ବେଳେ ୧୮ ବଲ୍ରୁ ମାତ୍ର ୭ ରନ୍କରି ବିଦାୟ ନେଇଥିଲେ। ଦଳକୁ ଫେରିଥିବା ଏଭିନ୍ ଲୁଇସ୍ ଓ ସାଇ ହୋପ୍ ଚମତ୍କାର ବ୍ୟାଟିଂ କରିଥିଲେ ହେଁ ୨ୟ ୱିକେଟ ପାଇଁ ୧୯ ଓଭରରେ ୯୮ ରନ୍ ଯୋଗ କରିଥିଲେ। ବାମହାତି ଲୁଇସ୍ ୭୮ ବଲ୍ରୁ ୨ଟି ଛକା ଓ ୬ଟି ଚୌକା ସହ ୫୮ ରନ୍କରି ଆଉଟ ହୋଇଥିଲେ। ପରେ ସିମ୍ରନ୍ ହେତ୍ମେୟର କ୍ରିଜ୍କୁ ଆସିବା ମାତ୍ରେ ରନ୍ଗତି ବଢ଼ିଥିଲା। ୧୦ ଓଭରରେ ସାଇ ହୋପ୍ ଓ ବାମହାତି ହେତ୍ମେୟର ୬୫ ରନ୍ ଯୋଡ଼ିଥିଲେ। ୩୧ ବଲ୍ରୁ ୨ଟି ଛକା ଓ ୩ଟି ଚୌକା ସହ ହେତ୍ମେୟର ୩୯ ରନ୍କରି ଆଉଟ ହୋଇଥିଲେ। ପରେ ସାଇ ହୋପ୍ ୯୨ ବଲ୍ରୁ ୨ଟି ଛକା ଓ ୬ଟି ଚୌକା ସହ ୭୭ ରନ୍କରି ବିଦାୟ ନେଇଥିଲେ। ୧୯୨ ରନ୍ରେ ୪ଟି ୱିକେଟ ପଡ଼ିିଯିବା ପରେ ନିକୋଲାସ୍ ପୁରନ୍ ଓ ଅଧିନାୟକ ଜେସନ୍ ହୋଲ୍ଡର ୧୧ ଓଭରରେ ଦ୍ରୁତ ୧୦୫ ରନ୍ ଯୋଡ଼ିଥିଲେ। ଗତ ମ୍ୟାଚ୍ରେ ଶତକ ମାରିଥିବା ବାମହାତି ପୁରନ୍ ୪୩ ବଲ୍ରୁ ଗୋଟିଏ ଛକା ଓ ୬ଟି ଚୌକା ସହ ୫୮ ରନ୍ କରିଥିଲେ। ପରବର୍ତ୍ତୀ ବଲ୍ରେ ହୋଲ୍ଡର ୩୪ ବଲ୍ରୁ ୪ଟି ଛକା ଓ ଗୋଟିଏ ଚୌକା ସହ ୪୫ ରନ୍କରି ବିଦାୟ ନେଇଥିଲେ। ଶେଷ ୩ଟି ବଲ୍ରୁ କାର୍ଲୋସ ବ୍ରାଥ୍ୱେଟ୍ ୧୪ ରନ୍ ନେଇ ଅପରାଜିତ ଥିଲେ।
Comments are closed.