ବାହାଘର ଘୁଞ୍ଚାଇଲେ ସୁନ୍ଦରଗଡ଼ର ଦୁଇ କରୋନା ଯୋଦ୍ଧା; ପୁଲିସ ଡ଼ିଜି କଲେ ଭୁରିଭୁରି ପ୍ରଶଂସା

ସୁନ୍ଦରଗଡ଼: ନିକଟରେ ପୁଲିସ ମହାନିର୍ଦେଶକ ଅଭୟ ସୁନ୍ଦରଗଡ଼ ଜିଲା ଗସ୍ତ କରିବା ଅବସରରେ ଦୁଇ ପୁଲିସ କର୍ମଚାରୀଙ୍କ ଭୁରିଭୁରି ପ୍ରଶଂସା କରିଛନ୍ତି । ଦୁଇଜଣ ମହିଳା ପୁଲିସ କର୍ମଚାରୀ କରୋନା ଦାୟିତ୍ବ ନିର୍ବାହ କରିବା ପାଇଁ ତାଙ୍କର ବିବାହ ତାରିଖକୁ ଘୁଞ୍ଚାଇ ଦେଇଥିବାରୁ ନିଜ ଟ୍ବିଟର ହ୍ୟାଣ୍ଡଲରେ ଡ଼ିଜି ସେମାନଙ୍କର ଫଟୋ ସହ ପ୍ରଶଂସା କରିଥିବା ଦେଖାଯାଇଛି ।

ତିଳୋତ୍ତମା ମେହେରଙ୍କ ବିବାହ ତିଥି ଥିଲା ଏପ୍ରିଲ ୧୨ ତାରିଖରେ । ମାତ୍ର ତାଙ୍କ ନିମନ୍ତେ ପ୍ରାଥମିକତା ଥିଲା କରୋନା ଦାୟିତ୍ବ । ସେ ନିଷ୍ଠାପର ଭାବରେ ଜଣେ କରୋନା ଯୋଦ୍ଧା ରୂପେ ନିଜର ଦାୟିତ୍ବ ସମ୍ପାଦନ କରୁଥିବା ଡ଼ିଜି ଉଲ୍ଲେଖ କରିଛନ୍ତି ।

ଅନୁରୂପ ଭାବରେ କନଷ୍ଟେବଳ ସୁନୀତା ଆଢ଼ାଙ୍କ ବିବାହ ତାରିଖ ୨୫ରେ ଧାର୍ଯ୍ୟ ହୋଇଥିଲା । ମାତ୍ର କରୋନା ଦାୟିତ୍ବ ତୁଲାଇବାରେ ସେ ଆଗେଇ ଆସିଥିଲେ ଓ ବିବାହ ତାରିଖକୁ ଘୁଞ୍ଚାଇ ଦେଇଥିବା ଡ଼ିଜିପି ଉଲ୍ଲେଖ କରିଛନ୍ତି ।