ହଂକଂ : ଚୀନ୍ର ଅଧିକ ଜନବହୁଳ ଗୁଆଙ୍ଗ୍ଡୋଙ୍ଗ୍ ପ୍ରଦେଶରେ ମାଙ୍ଗ୍ଖୁଟ୍ ଘୂର୍ଣ୍ଣିଝଡ଼ ବ୍ୟାପକ ଘୟକ୍ଷତି ଘଟାଇଛି। ଘଣ୍ଟା ପ୍ରତି ୧୬୨ କିଲୋମିଟର ବେଗରେ ପବନ ବହୁଛି। ହଂକଂରେ ତାଣ୍ଡବ ସୃଷ୍ଟି କରିବା ପୂର୍ବରୁ ଏହି ଘୂର୍ଣ୍ଣିଝଡ଼ ଫିଲିପାଇନ୍ସରେ ବ୍ୟାପକ କ୍ଷୟକ୍ଷତି ଘଟାଇଥିଲା। ସେଠାରେ ୪୯ ଜଣଙ୍କର ମୃତ୍ୟୁ ଘଟିଥିଲା । ଚଳିତ ବର୍ଷର ଏହି ଶକ୍ତିଶାଳୀ ଘୂର୍ଣ୍ଣିଝଡ଼ ରବିବାର ଅପରାହ୍ଣରେ ଚୀନ୍ର ଉପକୂଳବର୍ତ୍ତୀ ଜିଆଙ୍ଗ୍ମେନ୍ ନଗରୀ ନିକଟରେ ସ୍ଥଳଭାଗ ଛୁଇଁଥିଲା । ଚୀନ୍ର ସରକାରୀ ଗଣମାଧ୍ୟମ ଗୁଡ଼ିକରେ କୁହାଯାଇଛି, ଗୁଆଙ୍ଗ୍ଡୋଙ୍ଗ୍ ପ୍ରଦେଶରୁ ହଜାର ହଜାର ସଂଖ୍ୟାରେ ଲୋକଙ୍କୁ ସ୍ଥାନାନ୍ତରିତ କରାଯାଇଛି ଏବଂ ରେଡ୍ ଆଲର୍ଟ ଜାରି କରାଯାଇଛି ।
ହଂକଂ ସହରର ସୁଉଚ୍ଚ ଅଟ୍ଟାଳିକାର ଅନେକ ଝରକା ଓ କାଚ ଭାଙ୍ଗିଯାଇଛି । ଭଙ୍ଗା ଝରକା ଓ କାଚ ଆଦି ପବନରେ ଉଡ଼ିଆସି ଲୋକମାନଙ୍କୁ ଆଘାତ ଦେବାର ଆଶଙ୍କା ଥିବାରୁ ଘର ଭିତରେ ରହିବା ପାଇଁ ହଂକଂର ଅଧିବାସୀମାନଙ୍କୁ ପରାମର୍ଶ ଦିଆଯାଇଛି। ବର୍ତ୍ତମାନ ସୁଦ୍ଧା ୧୧୧ ଜଣ ଲୋକ ଆହତ ହୋଇଛନ୍ତି । ଦୋକାନ ବଜାର ଓ ସାର୍ବଜନୀନ ସେବାକେନ୍ଦ୍ର ଗୁଡ଼ିକୁ ବନ୍ଦ ରଖାଯାଇଛି। ହଂକଂ ବିମାନ ବନ୍ଦରୁ ୮୦୦ ବିମାନ ଚଳାଚଳକୁ ବାତିଲ କରାଯାଇଛି। ଫଳରେ ୧ ଲକ୍ଷରୁ ଅଧିକ ଯାତ୍ରୀ ଅଟକି ରହିଛନ୍ତି।
