ପିପିଲି: ଭୁବନେଶ୍ୱର-ପୁରୀ ଜାତୀୟ ରାଜପଥର ନିର୍ମଳା ଛକ ନିକଟ ବାଙ୍ଗରପଡାଠାରେ ରାଜପଥ ପାର୍ଶ୍ବସ୍ଥ ଏକ ଦୋକାନର ମାଲିକ କାହ୍ନୁଚରଣ ସାହୁଙ୍କୁ ମରଣାନ୍ତକ ଆକ୍ରମଣ ମାମଲାରେ ପିପିଲି ପୁଲିସ ୨ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ଦୁଇ ଅଭିଯୁକ୍ତ ହେଲେ ପୁରୁଣା ଭୁବନେଶ୍ୱର ହରଚଣ୍ଡି ସାହି ଅଞ୍ଚଳର ଦୀପକ ରଞ୍ଜନ ବେହେରା ଓ ଭିମଟାଙ୍ଗି ଅଞ୍ଚଳର ଅଭିଜିତ ପଟ୍ଟନାୟକ।
ସୂଚନା ଅନୁଯାୟୀ, ବାଙ୍ଗରପଡାଠାରେ ଥିବା ଦୋକାନକୁ ଶନିବାର ରାତିରେ କାହ୍ନୁଚରଣ ବନ୍ଦ କରିବା ସମୟରେ ଦୀପକ ଏବଂ ଅଭିଜିତ ଏକ ସ୍କୁଟିରେ ଆସି ହଠାତ୍ ଦୋକାନ ମଧ୍ୟରେ ସ୍କୁଟିକୁ ଭର୍ତ୍ତି କରିବା ସହ କାହ୍ନୁଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିଥିଲେ। ଏହାର ପ୍ରତିବାଦ କରିବାରୁ ଉଭୟ ଯୁବକ କାହ୍ନୁଚରଣଙ୍କୁ ମରଣାନ୍ତକ ଆକ୍ରମଣ କରିଥିଲେ। ସ୍କୁଟିର ଚାବି ଦ୍ୱାରା କାହ୍ନୁଙ୍କ ମୁଣ୍ଡ ଓ ମୁହଁକୁ ଆକ୍ରମଣ କରି ରକ୍ତାକ୍ତ କରିବା ସହ ତାଙ୍କ ତଣ୍ଟି ଚିପିଥିଲେ। କାହ୍ନୁଙ୍କ ଚିତ୍କାର ଶୁଣି ପାଖରେ ଥିବା କେତେକ ଯୁବକ ଘଟଣାସ୍ଥଳରେ ପହଞ୍ଚି ତାଙ୍କୁ ଉଦ୍ଧାର କରିବା ସହ ଦୁଇ ଆକ୍ରମଣକାରୀଙ୍କୁ କାବୁ କରିଥିଲେ । ଗୁରୁତର ଆହତ କାହ୍ନୁଙ୍କୁ ପ୍ରଥମେ ମଙ୍ଗଳପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିବା ବେଳେ ପରେ ସେଠାରୁ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ଏ ନେଇ ପିପିଲି ଥାନାରେ ଏକ ମାମଲା ରୁଜୁ ହୋଇଥିବା ବେଳେ ତଦନ୍ତକାରୀ ଅଧିକାରୀ ଏସ୍ଆଇ ରାଜନ ବିଶୋଇ ଦୁଇ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିବା ସହ ଘଟଣାର ତଦନ୍ତ ଜାରି ରଖିଛନ୍ତି। ଏହି ଘଟଣାଟି ସ୍ଥାନୀୟ ଅଞ୍ଚଳରେ ଆଲୋଡନ ସୃଷ୍ଟି କରିଥିବା ବେଳେ ରାଜପଥ କଡରେ ବ୍ୟବସାୟ କରୁଥିବା ଦୋକାନୀମାନଙ୍କ ସୁରକ୍ଷାକୁ ନେଇ ସାଧାରଣରେ ନାନା ପ୍ରଶ୍ନବାଚୀ ସୃଷ୍ଟି ହୋଇଛି।
