ଜି.ଉଦୟଗିରି : ଜି.ଉଦୟଗିରି ସ୍ଥିତ ଭଞ୍ଜ ମାର୍କେଟ ସମ୍ମୁଖ ମୂଖ୍ୟ ରାସ୍ତା ଉପରେ ଗୁରୁବାର ଅପରାହ୍ନ ପ୍ରାୟ ସାଢେ ୩ଟା ସମୟରେ ଏକ ମାଲବାହୀ ଟ୍ରକର ପଛ ଚକ ତଳେ ପଡି ଜଣେ ଯୁବକ ମୃତ୍ୟୁବରଣ କରିଥିବା ଛଣାପଡିଛି। ସୀମାଞ୍ଚଳ ଟ୍ରାନ୍ସପୋର୍ଟ ନାମକ ଏକ ମାଲବାହୀ ଟ୍ରକ ନଂ ଓଆର ୦୭ ଏଲ ୬୨୧୮ ଜି.ଉଦୟଗିରି ଦେଇ ଯାଉଥିବାବେଳେ ଗାନ୍ଧୀଛକ ନିକଟସ୍ଥ ଭଞ୍ଜ ମାର୍କେଟ ସମ୍ମୁଖ ମୁଖ୍ୟ ରାସ୍ତା ଉପରେ ଜି.ଉଦୟଗିରି ଶଙ୍ଖସାହିର ଶରତ ନାୟକ ନାମକ ଜଣେ ବ୍ୟକ୍ତି କୌଣସି କାରଣ ବଶତଃ ଟ୍ରକର ପଛ ଚକ ତଳେ ପଡିଯିବାରୁ ଘଟଣାସ୍ଥଳରେ ତାଙ୍କ ମୃତ୍ୟୁ ଘଟିଥିଲା ।
ଖବରପାଇ ପରିବାର ଲୋକେ ଘଟଣାସ୍ଥଳରେ ପହଞ୍ଚି ରାସ୍ତା ଉପରେ ବସି ରହିଥିଲେ। ଫଳରେ କିଛି ସମୟ ପାଇଁ ଉତ୍ତେଜନାମୁଳକ ପରିସ୍ଥିତି ସୃଷ୍ଟି ହେବାରୁ ମୂଖ୍ୟ ରାସ୍ତା ଦେଇ ଯାନବାହାନ ଚଳାଚଳ ବାଧାପ୍ରାପ୍ତ ହୋଇଥିଲା। ତୁରନ୍ତ ଘଟଣାସ୍ଥଳରେ ଆମ୍ବୁଲାନ୍ସ ପହଞ୍ଚି ମୃତ ବ୍ୟକ୍ତିକୁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିବାବେଳେ ଉପଖଣ୍ଡ ପୋଲିସ ଅଧିକାରୀ ବିଜୟ କୁମାର ବିଶି, ଥାନା ଅଧିକାରୀ ଭଗବାନ ପୂଜାରୀ ଓ ଅନ୍ୟ ପୋଲିସ କର୍ମଚାରୀ ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ପୁଣି ଯାତାୟତ ସ୍ବାଭାବିକ ହୋଇଥିଲା ।
