ଗୁଜରାଟ : ଗୁଜରାଟ ସ୍ଥିତ ଭଦୋଦରାର ଗୋଟିଏ ପରିବାର ପୁଲୱାମା ଆକ୍ରମଣରେ ସହିଦ ଯବାନମାନଙ୍କୁ ଏକ ଭିନ୍ନ ଢଙ୍ଗରେ ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି। ରବିବାର ପୁଅ ବାହାଘରରେ ଯାଉଥିବା ବରଯାତ୍ରୀ ଶୋଭାଯାତ୍ରାକୁ ପରିବାର ଲୋକେ ଶ୍ରଦ୍ଧାଞ୍ଜଳି ସଭାରେ ପରିବର୍ତ୍ତିତ କରିଥିଲେ। ପ୍ରଥମେ ଦୁଇ ମିନଟ୍ ନୀରବ ପ୍ରାର୍ଥନା ପରେ ବରଯାତ୍ରୀ ବାହାରିବା ସମୟରେ ଡିଜେରେ ଅନ୍ୟ ଗୀତ ପରିବର୍ତ୍ତେ ଦେଶଭକ୍ତିର ସଙ୍ଗୀତ ବଜାଇଥିଲେ। ବରଯାତ୍ରୀମାନେ ହାତରେ ତ୍ରିରଙ୍ଗା ଧରି ଶୋଭାଯାତ୍ରା ଆରମ୍ଭ କରିଥିଲେ।
ସୂଚନା ଅନୁସାରେ, ଭଦୋଦରାର କାରେଲିବାଗ ଅଞ୍ଚଳରେ ବାସ କରୁଥିବା ମନୀଷଙ୍କ ବିବାହ ଦୀପିକାଙ୍କ ସହ ଠିକ୍ ହୋଇଥିଲା। ଦୁହିଁଙ୍କ ବିବାହ ଧୁମଧାମରେ କରାଇବା ପାଇଁ ଦୁଇ ପରିବାର ମନସ୍ଥ କରିଥିଲେ। ହେଲେ ପୁଲୱାମା ଘଟଣା ବିଷୟରେ ଶୁଣିବା ପରେ ତୁରନ୍ତ ଦୁଇ ପରିବାର ନିଷ୍ପତ୍ତି ନେଇଥିଲେ ଯେ ବାହାଘରରେ କୌଣସି ନାଚଗୀତ କରାଯିବନାହିଁ। ଏଥିସହିତ ତ୍ରିରଙ୍ଗା ଉଡ଼ାଇ ବରଯାତ୍ରୀ ଶୋଭାଯାତ୍ରା ବାହାର କରିବାକୁ ପରିବାର ଲୋକେ ନିଷ୍ପତ୍ତି ନେଇଥିଲେ। ଉଭୟ ବର ଓ କନ୍ୟା ଏହାକୁ ସମର୍ଥନ କରି ନିଜେ ମଧ୍ୟ ହାତରେ ପତାକା ଓ ପ୍ଲାକାର୍ଡ଼ ଧରିଥିଲେ।
