ବହରାଇଚ : ମାଆର ମମତାର କୌଣସି ସୀମା ନାହିଁ। ନିଜ ଛୁଆକୁ ସୁରକ୍ଷା ଦେବାକୁ, ବିପଦରୁ ରକ୍ଷା କରିବାକୁ ଯେକୌଣସି ପରିସ୍ଥିତିର ସାମ୍ନା କରିବାକୁ ପଛାଏ ନାହିଁ। ଏଭଳି ହିଁ ଏକ ଘଟଣା ଉତ୍ତରପ୍ରଦେଶରେ ଘଟିଥିବା ନେଇ ଖବର ମିଳିଛି। ବାଘ ପାଟିରୁ ଛୁଆକୁ ଟାଣି ଆଣିଛି ମାଆ। ଘରର ଅଗଣାରେ ୬ ବର୍ଷର ଏକ ଶିଶୁ ଖେଳୁଥିବା ସମୟରେ ଏକ ବାଘ ସେଠାକୁ ଆସି ପାଟିରେ ଧରିଥିଲା। ଝିଅକୁ ବଞ୍ଚାଇବାକୁ ଯାଇ ମାଆ ବାଘ ସହ ଲଢେଇ କରିଛନ୍ତି। ମହିଳା ଜଣଙ୍କ ଏକ ଠେଙ୍ଗାରେ ବାଘକୁ ବାରମ୍ବାର ପ୍ରହାର କରିବା ଫଳରେ ବାଘ ଆହତ ହେବା ସହ ସେଠାରେ ଛୁଆକୁ ଛାଡି ପଳାଇଛି। ବାଘ ଆକ୍ରମଣରେ ଶିଶୁଟର ମୁହଁ ଓ ମୁଣ୍ଡରେ ଗଭୀର ଆଘାତ ହୋଇଛି। ବାଘ ଆକ୍ରମଣରେ ଆହତ ଶିଶୁଟିକୁ ତୁରନ୍ତ ଉଦ୍ଧାର କରାଯାଇ ପ୍ରାଥମିକ ଚିକିତ୍ସାକେନ୍ଦ୍ରରେ ଚିକିତ୍ସା କରିବା ପରେ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ଶିଶୁର ଅବସ୍ଥା ଗୁରୁତର ରହିଥିଲା।
ସୂଚନା ଯୋଗ୍ୟ, ବହରାଇଚ ବନ ବିଭାଗର ନାନପାରା ରେଞ୍ଜ ଅଞ୍ଚଳରେ ଖେରୀଘାଟ ଥାନାର ଗିରଦା ଗାଁର ନିବାସୀ ଉକ୍ତ ଶିଶୁଙ୍କ ପରିବାର। ଶିଶୁ ଅଗଣାରେ ଖେଳୁଥିବା ସମୟରେ ତାଙ୍କ ମାଆ ଝାଡୁ କରୁଥିଲେ। ମାତ୍ର ହଠାତ ସେହି ସମୟରେ ଚିତାବାଘ ଅଗଣା ଭିତରକୁ ପଶି ଆସିଥିଲା। ଛୁଆଟିକୁ ନିଜ ପାଟିରେ ଧରି ନେଇ ପଳାଇବାକୁ ଚେଷ୍ଟା କରିଥିଲା। ଏହି ସମୟରେ ଶିଶୁଙ୍କ ମାଆ ବାଘ ସହ ଲଢେଇ କରି ନିଜ ଛୁଆକୁ ମୃତ୍ୟୁ ମୁଖରୁ ଛଡାଇ ଆଣିଥିଲେ। ବନକର୍ମଚାରୀ ଘଟଣାର ତଦନ୍ତ କରୁଛନ୍ତି।
Comments are closed.