ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ହତ୍ୟା ନେଇ ଏକ ଧମକ ପରେ ପୁଲିସ ତତ୍ପରତା ବୃଦ୍ଧି ପାଇଛି । ୧୧୨ ହ୍ବାଟ୍ସଆପ୍ ନମ୍ବରକୁ ୯୬୯୬୭୫୫୧୧୩ ନମ୍ବରରୁ ଏହି ମେସେଜ ଆସିଛି । ଏ ସମ୍ପର୍କରେ ପୁଲିସ ଏକ ମାମଲା ରୁଜୁ କରିଛି ଓ ସାଇବର ପୁଲିସ ତଦନ୍ତ ଆରମ୍ଭ କରିଛି ।
ବାହୁବଳି ବିଧାୟକ ମୁଖତାର ଅନ୍ସାରୀକୁ ଜେଲରୁ ନ ଛାଡ଼ିବା ନେଇ ନିଷ୍ପତ୍ତିକୁ ବିରୋଧ କରି ଏହି ଧମକ ଦିଆଯାଇଥିବା ଚର୍ଚା ହେଉଛି । ଜଣେ ପୁଲିସ ଅଧିକାରୀଙ୍କ ସୂତ୍ରରୁ ମିଳିଥିବା ସୂଚନା ଅନୁସାରେ ଏହି ମେସେଜ ବୁଧବାର ସକାଳେ ପଠାଯାଇଥିଲା । ଏହା ସହ ଏଥିରେ ମୁଖ୍ୟମନ୍ତ୍ରୀଙ୍କ ପ୍ରତି କିଛି ଅଶାଳୀନ ଭାଷା ମଧ୍ୟ ପ୍ରୟୋଗ କରାଯାଇଥିଲା । ୨୪ ଘଣ୍ଟା ମଧ୍ୟରେ ମୁଖତାର ଆନସାରୀଙ୍କୁ ଜେଲରୁ ବାହାର ନ କଲେ ସରକାର ଭାଙ୍ଗି ଦିଆଯିବ ବୋଲି ମଧ୍ୟ ଏଥିରେ କୁହାଯାଇଥିଲା । ଏଠାରେ ଉଲ୍ଲେଖଯୋଗ୍ୟ ଯେ ଉତ୍ତରପ୍ରଦେଶ ସରକାର ବାହୁବଳୀ ଓ ସେମାନଙ୍କର ସମର୍ଥକମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଆରମ୍ଭ କରିଛି । ମୁଖତାରର ଅବୈଧ ସମ୍ପତ୍ତିକୁ ଜବତ କରାଯାଉଛି । ଏହାକୁ ନେଇ ତାଙ୍କ ସମର୍ଥକଙ୍କ ମଧ୍ୟରୁ କେହି ଏପରି ମେସେଜ ଦେଇଥିବା ପୁଲିସ ଅନୁମାନ କରୁଛି । ଲକ୍ଷ୍ନୌର ହଜରତଗଞ୍ଜ ଥାନାରେ ଏ ନେଇ ଏକ ମାମଲା ରୁଜୁ ହୋଇଛି । ମେସେଜ ପଠାଇଥିବା ଲୋକକୁ ଠାବ କରିବା ନିମନ୍ତେ ପୁଲିସ ପଦକ୍ଷେପ ନେବା ଆରମ୍ଭ କରିଛି ।
ଏହାପରେ ମୁଖ୍ୟମନ୍ତ୍ରୀଙ୍କ ସୁରକ୍ଷା ବ୍ୟବସ୍ଥା କଡ଼ାକଡ଼ି କରି ଦିଆଯାଇଛି । ଜୁନରେ ୧୧୨ ହ୍ବାଟସଆପ୍ ନମ୍ବରରେ ମଧ୍ୟ ଅନୁରୂପ ଏକ ମେସେଜ ଆସିଥିଲା । ଏହି ଘଟଣାରେ ପୁଲିସ ମୁମ୍ବାଇରୁ କାମରାନ ନାମକ ଜଣେ ସିକ୍ୟୁରିଟି ଗାର୍ଡ଼କୁ ଗିରଫ କରିଥିଲା । ଜାଭେରୀ ବଜାରରେ ରହୁଥିବା କାମରାନର ସ୍ପାଇନାଲ ଟିବି ଅପରେସନ ହୋଇଥିଲା ଓ ସେ ଏହାପରେ ଚାକିରି ଛାଡ଼ି ଦେଇଥିଲା ।
