ଭୁବନେଶ୍ବର: ଓଡ଼ିଶାରେ ଅଛନ୍ତି ୬୦ରୁ ୭୦ ନକ୍ସଲ। ସେଥିରୁ ଓଡ଼ିଶା କ୍ୟାଡ଼ର ସଂଖ୍ୟା ମାତ୍ର ୬ରୁ ୭ ଜଣ। ଓଡ଼ିଶାରେ ନକ୍ସଲ ଚଳପ୍ରଚଳ ପାଇଁ ଛତିଶଗଡ଼଼ ଓ ଆନ୍ଧ୍ର କ୍ୟାଡର ନେତୃତ୍ୱ ନେଉଛନ୍ତି। ଦେଶରେ ୩୮ ଏବଂ ଓଡ଼ିଶାରେ ୭ ଜିଲା ନକ୍ସଲ ପ୍ରଭାବିତ। ୨୦୨୬ ମାର୍ଚ୍ଚ ସୁଦ୍ଧା ଓଡ଼ିଶାକୁ ନକ୍ସଲମୁକ୍ତ ରାଜ୍ୟ କରିବାକୁ ପ୍ରୟାସ ଚାଲିଛି ବୋଲି ବିଏସଏଫର ବାର୍ଷିକ ସାମ୍ବାଦିକ ସମ୍ମିଳନୀରେ ଆଇଜି ଚାରୁଧ୍ବଜ ଅଗ୍ରୱାଲ ସୂଚନା ଦେଇଛନ୍ତି। ବାଂଲାଦେଶ ଅନୁପ୍ରବେଶକାରୀଙ୍କ ଉପରେ ସୀମାବର୍ତ୍ତୀ ଅଞ୍ଚଳରେ ନଜର ରଖାଯାଇଛି। ଏବର୍ଷ ଓଡ଼ିଶାରେ ୩ ଦୁର୍ଦାନ୍ତ ନକ୍ସଲଙ୍କୁ ନିହତ କରାଯିବା ସହ ୨୪ରୁ ଅଧିକ କ୍ୟାଡରଙ୍କୁ ଆତ୍ମସମର୍ପଣ କରାଇବାରେ ବିଏସ୍ଏଫ୍ ସଫଳ ହୋଇଛି।
ସେହିପରି ୩୪ଟି ଆଇଇଡି, ୧୧୭ଟି ଗ୍ରେନେଡ୍, ବିପୁଳ ପରିମାଣର ଅସ୍ତ୍ରଶସ୍ତ୍ର ଓ ବିସ୍ଫୋରକ ଜବତ କରାଯାଇଛି। ଆସନ୍ତା ଦିନରେ ନକ୍ସଲ ବିରୋଧୀ ଅଭିଯାନ ଜାରି ରହିବ ବୋଲି ଆଇଜି କହିଛନ୍ତି। ଓଡ଼ିଶା ପୁଲିସ ଏବଂ ଗୁଇନ୍ଦା ସହ ସମନ୍ବୟ ରଖି କାର୍ଯ୍ୟ କରାଯାଉଛି। ମାଓବାଦୀ ମୂଳପୋଛ ଲାଗି ଅତ୍ୟାଧୁନିକ ଜ୍ଞାନକୌଶଳ ବ୍ୟବହାର କରିବାକୁ ନିର୍ଦେଶ ରହିଛି। ୨୦୦୪ କୋରାପୁଟ ପୁଲିସ ଅସ୍ତ୍ରାଗାରରେ ଆକ୍ରମଣ, ୨୦୦୬ ମୋଟୁରେ ପୁଲିସକୁ ଆକ୍ରମଣ ଓ ୨୦୦୯ରେ ସିଆଇଏସ୍ଏଫ୍ ଦଳକୁ ଆକ୍ରମଣ ଘଟଣା ପରେ ୨୦୧୦ରେ ବିଏସ୍ଏଫ୍ ମାଓବାଦୀ ମୁକାବିଲା ଅଭିଯାନରେ ସାମିଲ ହୋଇଥିଲା। ବିଏସ୍ଏଫ୍ର ଅଭିଯାନ ପରେ ଓଡ଼ିଶାରେ ମାଓବାଦୀ ହିଂସା କମିଛି ବୋଲି ସେ କହିଛନ୍ତି। ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କ ଆହ୍ୱାନକ୍ରମେ ୨୦୨୬ ସୁଦ୍ଧା ଓଡ଼ିଶାରୁ ନକ୍ସଲବାଦର ବିଲୋପ ପାଇଁ ବିଏସଏଫ ସଂକଳ୍ପବଦ୍ଧ ବୋଲି ଆଇଜି ଶ୍ରୀ ଅଗ୍ରୱାଲ କହିଛନ୍ତି।
