ଲକ୍ଷ୍ନୌ : ୟୁପିର ରାୟବରେଲି ଜିଲାରେ ଏକ ଅଜବ ଘଟଣା ସାମ୍ନାକୁ ଆସିଛି । ଏଠାରେ ଜଣେ ବାଳକ ଖେଳିବା କୁଦିବା ବୟସରେ ଘର ଛାଡି ଦେଇଥିଲା । ପିଲାଦିନେ ତା ସାବତ ମା ତାକୁ ପାଟି କରିବାରୁ ସେ ୧୧ ବର୍ଷ ବୟସରେ ଘରୁ କେଉଁଆଡେ ଚାଲିଯାଇଥିଲା । ଏବେ ସେ ୨୨ ବର୍ଷ ପରେ ଗାଁକୁ ଫେରିଛି । ଯୁବକ ଘରକୁ ଫେରିବା ପରେ ଘରେ ଖୁସି ବଦଳରେ ଦୁଃଖର ଛାୟା ଖେଳିଯାଇଛି । କାରଣ ଘର ଛାଡିଥିବା କୁନି ପିଲା ଆଜି ଜଣେ ସାଧୁ ବାବା ହୋଇଯାଇଛି । ସେ ଘରକୁ କେବଳ ଭିକ୍ଷା ନେବା ପାଇଁ ଆସିଥିଲେ । ଘର ଲୋକେ ତାଙ୍କୁ ଅନେକ ବୁଝାଇବା ପରେ ମଧ୍ୟ ରହିଲେନି ଏବଂ ଭିକ୍ଷା ନେଇ ପୁଣି ଚାଲିଗଲେ ।
ଘଟଣାଟି ହେଉଛି ଜାୟସ ଥାନା ଅଞ୍ଚଳର ଖରୌଲୀ ଗାଁର । ଏହି ଗାଁରେ ରହୁଥିବା ରତିପାଲ ସିଂହ ନିଜ ପତ୍ନୀ ଏବଂ ପୁଅ ପିଙ୍କୁ ସିଂହ ସହିତ ଦିଲ୍ଲୀରେ ରହୁଥିଲେ । କିଛି ଦିନ ପରେ ତାଙ୍କ ପତ୍ନୀଙ୍କ ମୃତ୍ୟୁ ହୋଇଗଲା । ଏହା ପରେ ସେ ଭାନୁମତି ନାମକ ଜଣେ ମହିଳାଙ୍କ ଦ୍ବିତୀୟ ବିବାହ କଲେ । ତେବେ ୨୦୦୨ ମସିହାରେ ପିଙ୍କୁକୁ ଭାନୁମତୀ କୌଣସି କାରଣ ପାଇଁ ପାଟି କରିଥିଲେ । ଏହା ପରେ ରାଗିଯାଇ ଘରୁ କେଉଁଆଡେ ଚାଲିଗଲେ । ବହୁତ ଖୋଜାଖୋଜି କରାଗଲା କିନ୍ତୁ ସେ କେଉଁଠି ବି ମିଳିଲାନି ।
୨୨ ବର୍ଷ ପରେ ଯେବେ ସେ ଫେରିଲେ ତାଙ୍କ ଘର ଲୋକଙ୍କ ଖୁସିର ଠିକଣା ରହିଲାନି । ପରିବାର ଲୋକେ ସମସ୍ତେ ଏକାଠି ହୋଇଗଲେ ତାଙ୍କୁ ଦେଖିବା ପାଇଁ । କିନ୍ତୁ ତାଙ୍କ ବେଶଭୁଷା ଦେଖି ସମସ୍ତେ ଆଶ୍ଚର୍ଯ୍ୟ ହୋଇଗଲେ । ସେ ସାଧୁ ପାଲଟିଯାଇଥିଲେ ଏବଂ ଘରକୁ କେବଳ ଭିକ୍ଷା ନେବା ପାଇଁ ଆସିଥିଲେ । ତାଙ୍କୁ ପରିବାର ଲୋକେ ବହୁତ ବୁଝାଇଲେ କିନ୍ତୁ ସେ କିଛି ବି ଶୁଣିଲେନି । ଘରେ ରହିଯିବାକୁ ସମସ୍ତେ ବାଧ୍ୟ କଲେ କିନ୍ତୁ ସେ ଭିକ୍ଷା ନେଇ ପୁଣି ନିଜ ଯାତ୍ରା ଆରମ୍ଭ କରିଦେଲେ ।
