ନୂଆଦିଲ୍ଲୀ : ଚଳଚ୍ଚିତ୍ର ‘ଦ ଆକ୍ସିଡେଣ୍ଟାଲ୍ ପ୍ରାଇମମିନିଷ୍ଟର’ରେ ମୁଖ୍ୟ ଭୂମିକା ଗ୍ରହଣ କରିଥିବା ଅନୁପମ୍ ଖେରଙ୍କ ସମେତ ୧୪ଜଣ କଳାକାରଙ୍କ ନାମରେ ଏତଲା ରୁଜୁ କରିବା ପାଇଁ ମଙ୍ଗଳବାର ବିହାରର ମୁଜାଫରପୁର ସ୍ଥିତ ଏକ ଅଦାଲତ ନିର୍ଦ୍ଦେଶ ଦେଇଛନ୍ତି। ସୂଚନା ଅନୁସାରେ, ଆଇନଜୀବୀ ସୁଧୀର ଓଝାଙ୍କ ଅଭିଯୋଗ ପତ୍ରର ଶୁଣାଣି କରି ସବ୍ ଡିଭିଜନାଲ୍ ଜୁଡିସିଆଲ କୋର୍ଟ ଅନୁପମ ଖେର୍ ଓ ବାକି ୧୪ କଳାକାରଙ୍କ ନାମରେ ଏତଲା ରୁଜୁ କରି ତଦନ୍ତ କରିବା ପାଇଁ ମୁଜାଫରପୁର କାଣ୍ଟି ଥାନା ଅଧିକାରୀଙ୍କୁ ଆଦେଶ ଦେଇଛନ୍ତି। ତେବେ ପୂର୍ବରୁ ୨ ଜାନୁଆରୀରେ ଓଝା ଅଦାଲତରେ ଏକ ଅଭିଯୋଗ ପତ୍ର ଦାଖଲ କରିଥିଲେ। ତାଙ୍କ ଅଭିଯୋଗ ଅନୁସାରେ ଚଳଚ୍ଚିତ୍ରରେ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କ ସମେତ ଦେଶର ତୁଙ୍ଗ ନେତାମାନଙ୍କ ଭାବମୂର୍ତ୍ତିକୁ ଅସମ୍ମାନ କରି ଚିତ୍ରଣ କରାଯାଇଛି।
ବିଜେପି ସାଂସଦ କିରଣ ଖେରଙ୍କ ସ୍ୱାମୀ ପ୍ରସିଦ୍ଧ ଅଭିନେତା ଅନୁପମ ଖେର ଓ ବିଜେପିର ପୂର୍ବତନ ସାଂସଦ ତଥା ଲୋକପ୍ରିୟ ଅଭିନେତା ବିନୋଦ ଖନ୍ନାଙ୍କ ପୁଅ ଅକ୍ଷୟ ଖନ୍ନା ଏହି ଚଳଚ୍ଚିତ୍ରରେ ମୁଖ୍ୟ ଭୂମିକାରେ ଅଭିନୟ କରିଛନ୍ତି। କଂଗ୍ରେସର ଅଭିଯୋଗ ଅନୁସାରେ, ଲୋକସଭା ନିର୍ବାଚନରେ ଲାଭ ଉଠାଇବା ପାଇଁ ବିଜେପି ଏହି ଚଳଚ୍ଚିତ୍ର ନିର୍ମାଣ କରିଛି ଓ ନିର୍ବାଚନ ପାଇଁ ମାତ୍ର ୫ମାସ ବାକି ଥିବା ବେଳେ ଏହାକୁ ମୁକ୍ତିଲାଭ କରାଯାଉଛି। ଏହି ଚଳଚ୍ଚିତ୍ର ଆସନ୍ତା ୧୧ ତାରିଖରେ ମୁକ୍ତିଲାଭ କରିବାକୁ ଯାଉଛି।
