ପାଟନା: ବିହାର ବିଧାନସଭା ନିର୍ବାଚନ ପ୍ରସ୍ତୁତି ମଧ୍ୟରେ ରାଜନୀତି ସରଗରମ ହୋଇଛି । ଦିନକ ତଳେ ନୀତିଶକୁମାର ନେତୃତ୍ବାଧୀନ ଜେଡ଼ିୟୁରୁ ବହିଷ୍କୃତ ଜଣେ ମନ୍ତ୍ରୀ ଲାଲୁ ଯାଦବଙ୍କ ଦଳ ଆରଜେଡ଼ିରେ ସାମିଲ ହୋଇଥିବାବେଳେ ଆଜି ଲାଲୁ ଯାଦବଙ୍କ ସମୁଦି ଚନ୍ଦ୍ରିକା ରାୟ ଓ ଅନ୍ୟ ୨ ଜଣ ବିଧାୟକ ଆରଜେଡ଼ି ଛାଡ଼ି ଜେଡ଼ିୟୁରେ ସାମିଲ ହେବାକୁ ଘୋଷଣା କରିଛନ୍ତି।
ଚନ୍ଦ୍ରିକା ରାୟ ହେଉଛନ୍ତି ଛପ୍ରା ଜିଲାର ପରସା ବିଧାନସଭା କ୍ଷେତ୍ରର ବିଧାୟକ । ଲାଲୁଙ୍କ ପୁଅ ତେଜପ୍ରତାପ ଯାଦବ ହେଉଛନ୍ତି ତାଙ୍କର ଜ୍ବାଇଁ । ତେଜପ୍ରତାପ ଓ ତାଙ୍କ ପତ୍ନୀ ଐଶ୍ବର୍ଯ୍ୟାଙ୍କ ମଧ୍ୟରେ ସମ୍ପର୍କ ଅତ୍ୟନ୍ତ ଖରାପ ରହିଛି ଓ ତାହା ଛାଡ଼ପତ୍ର ପର୍ଯ୍ୟନ୍ତ ପହଞ୍ଚିଛି । ଛାଡ଼ପତ୍ର ମାମଲା ଏବେ କୋର୍ଟରେ ବିଚାରାଧୀନ ରହିଛି । ତାଙ୍କୁ ନିର୍ଯାତନା ଦିଆଯାଉଥିବା ନେଇ ଐଶ୍ବର୍ଯ୍ୟା ଅଭିଯୋଗ କରିବା ସହ ଲାଲୁଙ୍କ ପରିବାର ଛାଡ଼ି ଦେଇଥିଲେ ଓ ଏହାପରେ ବାପା ଚନ୍ଦ୍ରିକା ରାୟ ଦଳରୁ ଇସ୍ତଫା ଦେଇଥିଲେ । ସେହିପରି ଚନ୍ଦ୍ରିକାଙ୍କ ସହ ଜେଡ଼ିୟୁରେ ସାମିଲ ହେବା ନିମନ୍ତେ ପାଲିଗଞ୍ଜ କ୍ଷେତ୍ରର ବିଧାୟକ ଜୟବର୍ଧନ ଯାଦବ ଓ କେୱଟିର ଫରାଜ ଫାତମୀ ମଧ୍ୟ ଘୋଷଣା କରିଛନ୍ତି । ଜୟବର୍ଦ୍ଧନ ଓ ଫରାଜଙ୍କୁ ଦୁଇଦିନ ତଳେ ଆରଜେଡ଼ିରୁ ବହିଷ୍କାର କରାଯାଇଥିଲା । ଫରାଜ ଆରଜେଡ଼ିର ପୂର୍ବତନ ସାଂସଦ ତଥା ଲାଲୁଙ୍କ ଘନିଷ୍ଠ କୁହାଯାଉଥିବା ଅସରଫ ଅଲ୍ଲୀଙ୍କ ପୁଅ ।
Comments are closed.