ଗୁଣୁପୁର: ଗୁଣୁପୁର ଥାନା ଅନ୍ତର୍ଗତ ବିକ୍ରମପୁର ଗ୍ରାମ ଦଣ୍ଡାସି ସାହିରେ ଜଣେ ବିବାହିତ ମହିଳାଙ୍କ ସନ୍ଦେହଜନକ ଭାବେ ମୃତ୍ୟୁ ଘଟିଛି। ମୃତା ମହିଳା ହେଲେ ଅନିତା ମାଣ୍ଡାଙ୍ଗୀ(୨୦)। ତାଙ୍କୁ ହତ୍ୟା କରାଯାଇଥିବା ନେଇ ଅନିତାଙ୍କ ବାପଘର ପକ୍ଷରୁ ଅଭିଯୋଗ କରାଯାଇଛି। ଏହି ଘଟଣାରେ ପୁଲିସ ତାଙ୍କ ସ୍ଵାମୀଙ୍କୁ ଅଟକ ରଖି ପଚରାଉଚରା କରୁଛି।
ରାମନାଗୁଡ଼ା ବ୍ଲକ ନାଲପଣ୍ଡା ଗ୍ରାମର ଅନିତା ଗୁଣୁପୁର ପୌରପରିଷଦ ଅନ୍ତର୍ଗତ ବିକ୍ରମପୁର ଗ୍ରାମରେ ୨ ବର୍ଷ ତଳେ ବିବାହ କରିଥିଲେ। ଶନିବାର ଅନିତାଙ୍କୁ ତାଙ୍କ ସ୍ଵାମୀ ଝୁଲନ୍ତା ଅବସ୍ଥାରେ ଦେଖିବା ପରେ ତାଙ୍କ ବାପ ଘରକୁ ଖବର ଦେଇଥିଲେ। ସ୍ଵାମୀ କହିଛନ୍ତି ଯେ, ସେ ଜଣେ ଦିନ ମଜୁରିଆ। ସେ କାମ କରିବା ପାଇଁ ବାହାରକୁ ଯାଇଥିଲେ। ଘରକୁ ଫେରିବା ପରେ ସ୍ତ୍ରୀ ଅନିତା ବେକରେ ଲୁଗାଦେଇ ଆତ୍ମହତ୍ୟା କରିଥିଲେ। ତାଙ୍କୁ ଉଦ୍ଧାର କରିବା ପାଇଁ ସେ ଚେଷ୍ଟା ତଳକୁ ଓଲ୍ଲାଇ ଦେବା ସହିତ ତାଙ୍କ ବାପ ଘରକୁ ଖବର ଦେଇଥିଲେ। ଅନ୍ୟପଟେ ଅନିତାଙ୍କୁ ତାଙ୍କ ସ୍ବାମୀ ମଦପିଇ ନିର୍ଯାତନା ଦେଉଥିବା ସହ ତାଙ୍କୁ ହତ୍ୟା କରିଥିବା ନେଇ ବାପଘର ପକ୍ଷରୁ ଗୁଣୁପୁର ଥାନାରେ ଅଭିଯୋଗ କରାଯାଇଛି। ପୁଲିସ ତଦନ୍ତ କରିବା ସହ ମୃତଦେହକୁ ଜବତ କରି ଗୁଣୁପୁର ଉପଖଣ୍ଡସ୍ତରୀୟ ସ୍ବାସ୍ଥ୍ୟକେନ୍ଦ୍ରକୁ ବ୍ୟବଚ୍ଛେଦ ପାଇଁ ପଠାଇଛି।
Comments are closed.