ନୂଆଦିଲ୍ଲୀ : ନକଲି କମ୍ପାନୀ ବା ଖରାପ ଗୁଣବତ୍ତା ବିଶିଷ୍ଟ ହେଲମେଟକୁ ନେଇ ସରକାର ଗୁରୁତ୍ବପୂର୍ଣ୍ଣ ପଦକ୍ଷେପ ଉଠାଇଛନ୍ତି । ବିଆଇଏସ୍ ରାଜ୍ୟ ଓ ଜିଲାଧିକାରୀଙ୍କୁ ଚିଠି ଲେଖିଛନ୍ତି । ବିଆଇଏସ୍ ଏହାର ନିୟନ୍ତ୍ରଣ ଓ ଉତ୍ପାଦନ ଉପରେ ରୋକ ଲଗାଇବାକୁ ନେଇ ଅଭିଯାନ ଚଳାଇବାକୁ କହିଛି । ସୂଚନାଯୋଗ୍ୟ ୧୬୨ ଉତ୍ପାଦକଙ୍କ ଲାଇସେନ୍ସ ରଦ୍ଦ ହୋଇସାରିଛି କିମ୍ବା ସେମାନଙ୍କ ବୈଧତା ସମାପ୍ତ ହୋଇସାରିଛି । ଏହି ଉତ୍ପାଦକ ଦିଲ୍ଲୀ, ହରିୟାଣା, ଉତ୍ତର ପ୍ରଦେଶ, ରାଜସ୍ଥାନ, ମହାରାଷ୍ଟ୍ର, କର୍ଣ୍ଣାଟକ ରାଜ୍ୟରେ ରହିଛି ।
ରୋଡ୍ ସେଫ୍ଟି ଓ ଉପଭୋକ୍ତାଙ୍କ ସୁରକ୍ଷାକୁ ଧ୍ୟାନରେ ରଖି କଞ୍ଜ୍ୟୁମର ଅଫେୟର୍ସ ଡିପାର୍ଟମେଣ୍ଟ ଏକ ଗୁରୁତ୍ବପୂର୍ଣ୍ଣ ପଦକ୍ଷେପ ଉଠାଇଛି । ତଦନୁସାରେ ଜିଲାପାଳମାନଙ୍କୁ ଏକ ଚିଠି ଲେଖାଯାଇଛି, ଯାହା ଫଳରେ ସାରା ଦେଶରେ ଏକ ଅଭିଯାନ ଚଳାଇବାକୁ କୁହାଯାଇଛି । ଏହି ଅଭିଯାନରେ ଖରାପ ମାନର ହେଲମେଟ୍ ପ୍ରସ୍ତୁତ, ବିକ୍ରି କରୁଥିବା ସଂସ୍ଥାଙ୍କୁ ଟାର୍ଗେଟ୍ କରିବାକୁ କୁହାଯାଇଛି ।
ଅନେକ ଖରାପ ମାନର ହେଲମେଟ୍ ରାସ୍ତା କଡରେ ବିକ୍ରି ହେଉଛି ଯାହା ଦୁର୍ଘଟଣାରେ ସଠିକ୍ ସୁରକ୍ଷା ଦେଇପାରୁନି । ସରକାର ପୂର୍ବରୁ ମୋଟର ଯାନ ଅଧିନିୟମ ୧୯୮୮ ଅନୁସାରେ ହେଲମେଟ୍ ପିନ୍ଧିବା ବାଧ୍ୟତାମୂଳକ କରିଦେଇଛନ୍ତି । ଏପର୍ଯ୍ୟନ୍ତ ୧୬୨ ଲାଇସେନ୍ସକୁ ଖରାପ/ନନ୍-ଆଇଏସଆଇ ହେଲମେଟ୍ ନିର୍ମାଣ ପାଇଁ ରଦ୍ଦ ବା ସମାପ୍ତ କରିଦିଆଯାଇଛି । ଏପରିକି ୨୭ ଉତ୍ପାଦକଙ୍କ ବିରୁଦ୍ଧରେ ବିଭିନ୍ନ କୋର୍ଟରେ ମାମଲା ଦାୟର ହୋଇଛି ।
