ନୂଆଦିଲ୍ଲୀ : ସ୍ୱଳ୍ପ ସଞ୍ଚୟକାରୀଙ୍କ ପାଇଁ ଭଲ ଖବର। କାରଣ କେନ୍ଦ୍ର ସରକାର ଗୁରୁବାର କେତେକ ସ୍ୱଳ୍ପ ସଞ୍ଚୟ ଯୋଜନାର ସୁଧହାରରେ ୪୦ ବେସିସ୍ ପଏଣ୍ଟ ବା ୦.୪% ବୃଦ୍ଧି କରିଛନ୍ତି। ଚଳିତ ବର୍ଷର ତୃତୀୟ ତ୍ରୈମାସ ଅର୍ଥାତ୍ ଅକ୍ଟୋବରରୁ ଡିସେମ୍ବର ମଧ୍ୟରେ ଏହି ସଂଶୋଧିତ ସୁଧ ଲାଗୁ ହେବ। ବ୍ୟାଙ୍କଗୁଡିକରେ ବିଭିନ୍ନ କ୍ଷୁଦ୍ର ସଞ୍ଚୟ ଯୋଜନାରେ ସୁଧହାରରେ ବୃଦ୍ଧିକୁ ଦୃଷ୍ଟିରେ ରଖି ଏହି ସ୍ୱଳ୍ପ ସଞ୍ଚୟ ଯୋଜନାଗୁଡିକର ସୁଧହାରରେ ଏହି ବୃଦ୍ଧି କରାଯାଇଛି। ଏଥିରେ ପବ୍ଲିକ ପ୍ରୋଭିଡେଣ୍ଟ ଫଣ୍ଡ (ପିପିଏଫ୍), ଜାତୀୟ ସଞ୍ଚୟ ପ୍ରମାଣପତ୍ର (ଏନ୍ଏସ୍ସି), ସୁକନ୍ୟା ସମୃଦ୍ଧି ଯୋଜନା ଏବଂ ଡାକଘର ଅବଧି ଜମା ଆଦି ଅନ୍ତର୍ଭୁକ୍ତ। ଚଳିତମାସ ୧୯ କେନ୍ଦ୍ର ଅର୍ଥ ମନ୍ତ୍ରାଳୟ ପକ୍ଷରୁ ଜାରି କରାଯାଇଥିବା ସର୍କୁଲାର ଅନୁଯାୟୀ, ବିଭିନ୍ନ ସ୍ୱଳ୍ପ ସଞ୍ଚୟ ଯୋଜନାର ସୁଧହାରରେ ୩୦ରୁ ୪୦ ବେସିସ୍ ପଏଣ୍ଟ(୧% ପଏଣ୍ଟ ୧୦୦ ବେସିସ୍ ପଏଣ୍ଟ ସହ ସମାନ) ବୃଦ୍ଧି କରାଯାଇଛି। ଏହି ଅନୁଯାୟୀ,୧ବର୍ଷ, ୨ବର୍ଷ ଏବଂ ୩ ବର୍ଷ ଅବଧି ବିଶିଷ୍ଟ ଜମା ସୁଧହାରରେ ୩୦ ବେସସ୍ ପଏଣ୍ଟ ବୃଦ୍ଧିି କରାଯାଇଛି। ତେବେ ୫ବର୍ଷିଆ ସୁକନ୍ୟା ସମୃଦ୍ଧିି ଯୋଜନା ଏବଂ ପିପିଏଫ୍ର ଜମା ସୁଧହାରରେ ୪୦ ବେସିସ୍ ପଏଣ୍ଟ ବୃଦ୍ଧି ହୋଇଛି। ଏହି ବୃଦ୍ଧିିି ପରେ ପିପିଏଫ୍ ଏବଂ ଏନ୍ଏସ୍ସିରେ ୮%, ସୁକନ୍ୟା ସମୃଦ୍ଧିିରେ ୮.୫%, ବରିଷ୍ଠ ନାଗରିକ ସଞ୍ଜୟ ଜମା ଉପରେ ୮.୭% ସୁଧ ହାର ଉପଲବ୍ଧ ହେବ। ଅନ୍ୟପକ୍ଷରେ ଡାକଘର ସଞ୍ଚୟ ଖାତା ଜମା ଉପରେ ସୁଧହାର ୪%ରେ ଅପରିବର୍ତ୍ତିତ ରଖାଯାଇଛି।
