ମୁମ୍ବଇ: ଶନିବାର ଫେବୃଆରୀ ୧ରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ବଜେଟ୍ ଉପସ୍ଥାପନ କରିବେ। ତେବେ ଏହି ଦିନ ଶନିବାର ପଡ଼ୁଥିେଲ ମଧ୍ୟ ଭାରତୀୟ ପୁଞ୍ଜି ବଜାର ଖୋଲା ରହିବ ବୋଲି ଏନ୍ଏସ୍ଇ ଓ ବିଏସ୍ଇ ଘୋଷଣା କରିଛନ୍ତି। ସୋମବାର ଏନେଇ ଏକ ସର୍କୁଲାର ଜାରି କରି ଫେବୃଆରୀ ୧ ପୂର୍ବାହ୍ଣ ୯ଟା ୧୫ରୁ ଅପରାହ୍ଣ ୩ଟା ୩୦ ପର୍ୟ୍ୟନ୍ତ ଭାରତୀୟ ପୁଞ୍ଜି ବଜାର ଖୋଲା ରହିବ ବୋଲି ସୂଚନା ଦିଆଯାଇଛି।
ତେବେ ଶନିବାର ପୁଞ୍ଜି ବଜାର ବନ୍ଦ ରହୁଥିଲେ ମଧ୍ୟ ବଜେଟ୍ ପାଇଁ ସ୍ବତନ୍ତ୍ରଭାବେ ଖୋଲା ରହିବ। କାରଣ ଆଗାମୀ ବର୍ଷ ପାଇଁ ସରକାରଙ୍କ ଆର୍ଥିକ ଯୋଜନା ପ୍ରସ୍ତୁତ କରୁଥିବା କେନ୍ଦ୍ରୀୟ ବଜେଟ୍ ବଜାର ଧାରା, ନିବେଶକଙ୍କ ଭାବନା ଏବଂ ପୁଞ୍ଜି ବଜାର ମୂଲ୍ୟାଙ୍କନକୁ ଗୁରୁତ୍ୱପୂର୍ଣ୍ଣ ଭାବରେ ପ୍ରଭାବିତ କରେ। ବଜେଟ୍ ଉପସ୍ଥାପନା ସମୟରେ ପୁଞ୍ଜି ବଜାର ଖୋଲା ରଖିବା ଦ୍ବାରା ଅଂଶଗ୍ରହଣକାରୀ ବାସ୍ତବ ସମୟ(ରିୟଲ ଟାଇମ୍)ରେ ପ୍ରତିକ୍ରିୟା ଦେଇପାରିବେ। ବଜାର ବିଶ୍ଲେଷକ ଆର୍ଥିକ ଅଭିବୃଦ୍ଧି, କର, ସରକାରୀ ଖର୍ଚ୍ଚ ଏବଂ କ୍ଷେତ୍ର କାର୍ୟ୍ୟଦକ୍ଷତା ଉପରେ ସେମାନଙ୍କର ସମ୍ଭାବ୍ୟ ପ୍ରଭାବ ପାଇଁ ବଜେଟ୍ ଘୋଷଣାଗୁଡ଼ିକୁ ନିକଟରୁ ନିରୀକ୍ଷଣ କରିବେ।
୨୦୨୫-୨୬ ଆର୍ଥିକ ବର୍ଷ ପାଇଁ ସୀତାରମଣ ଫେବୃଆରୀ ୧ରେ କେନ୍ଦ୍ରୀୟ ବଜେଟ୍ ଉପସ୍ଥାପନ କରିବାକୁ ଯାଉଛନ୍ତି, ଯାହା ତାଙ୍କର କ୍ରମାଗତ ଅଷ୍ଟମ ବଜେଟ୍ ଉପସ୍ଥାପନ ହେବ। ନିର୍ବାଚନ ପୂର୍ବରୁ ୨୦୨୪ ଫେବୃଆରୀରେ ସୀତାରମଣ ଏକ ଅନ୍ତରୀଣ ବଜେଟ୍ ଉପସ୍ଥାପନ କରିଥିଲେ। ଲୋକସଭା ନିର୍ବାଚନ ପରେ ୨୦୨୪ ଜୁଲାଇ ୨୩ରେ ସୀତାରମଣ କେନ୍ଦ୍ରୀୟ ବଜେଟ୍ ଉପସ୍ଥାପନ କରିଥିଲେ।
ବଜେଟ୍ ପାଇଁ ଶନିବାର ଖୋଲା ରହିବ ପୁଞ୍ଜି ବଜାର
Popular Categories
Previous article
Next article