ଭବାନୀପାଟଣା: ଶୁକ୍ରବାର ପ୍ରକାଶିତ ଓଡ଼ିଶା ସିଭିଲ ସର୍ଭିସ ପରୀକ୍ଷାରେ କଳାହାଣ୍ଡିର ଶୈଳେଶ ଭୋଇ ସପ୍ତମ ସ୍ଥାନ ଅଧିକାର କରିଛନ୍ତି। ଧର୍ମଗଡ ବାସିନ୍ଦା ଶୈଳେଶ କର୍ଣ୍ଣାଟକରେ କାନାରା ବ୍ୟାଙ୍କରେ କାର୍ଯ୍ୟ କରୁଥିଲେ। ହେଲେ ସେ ଓଏଏସ ପରୀକ୍ଷା ପାଇଁ ସେ ଚାକିରି ଛାଡ଼ିଥିଲେ। କୌଣସି କୋଚିଂ ସେଣ୍ଟରରେ ନାମ ଲେଖାଇବା ବଦଳରେ ସାମାଜିକ ଗଣମାଧ୍ୟମ ଏବଂ ଅନଲାଇନ୍ କୋଚିଂରୁ ଶିକ୍ଷା ଗ୍ରହଣ କରି ସେ କୃତକାର୍ଯ୍ୟ ହୋଇଥିବା ସ୍ଵୀକାର କରିଛନ୍ତି।
ଶୈଳେଶ ଧର୍ମଗଡ ସରସ୍ଵତୀ ଶିଶୁ ମନ୍ଦିରରେ ଦଶମ ଶ୍ରେଣୀ ପର୍ଯ୍ୟନ୍ତ ପଢ଼ିବା ପରେ ବ୍ରହ୍ମପୁର ସରସ୍ଵତୀ ଶିଶୁ ମନ୍ଦିରରେ ଯୁକ୍ତ ଦୁଇ ଏବଂ ଭୁବନେଶ୍ୱର ବିଜେବି କଲେଜରେ ଯୁକ୍ତ ୩ ପାଠ ପଢିଥିଲେ। ପରେ ବ୍ୟାଙ୍କିଙ୍ଗ ପାଇଁ ପ୍ରସ୍ତୁତ ହୋଇ କାନାରା ବ୍ୟାଙ୍କରେ କାର୍ଯ୍ୟ କରୁଥିଲେ। ବ୍ୟାଙ୍କ୍ ରେ କାର୍ୟ୍ୟ କରିବା ସହିତ ସେ ଅନଲାଇନରେ ଓଏଏସ ପାଇଁ ପ୍ରସ୍ତୁତ ହେଉଥିଲେ। ଗୋଲାମୁଣ୍ଡା ବ୍ଲକ ଚପ୍ରିଆ ହାଇସ୍କୁଲରେ ଶିକ୍ଷକତା କରୁଥିବା ନିରଞ୍ଜନ ଭୋଇ ଏବଂ ମାଆ ଗୀତାଞ୍ଜଳି ଭୋଇଙ୍କ ବଡ଼ ପୁଅ ଶୈଳେଶ ଲୋକଙ୍କ ସେବାକୁ ପ୍ରାଧାନ୍ୟ ଦେବେ ବୋଲି କହିଛନ୍ତି। ତାଙ୍କର ଏହି ସଫଳତା ଯୋଗୁ ତାଙ୍କୁ ଶୁଭେଚ୍ଛାର ସୁଅ ଛୁଟୁଛି।
