ଭୁବନେଶ୍ବର: ଆଉ ମାସ କେଇଟା ପରେ ସରିଯିବ ୨୦୨୫-୨୬ ଶିକ୍ଷାବର୍ଷ। ହେଲେ ଏପର୍ଯ୍ୟନ୍ତ ବହୁ ଛାତ୍ରଛାତ୍ରୀଙ୍କୁ ୟୁନିଫର୍ମ ମିଳିପାରିନି। ଫଳରେ ସେମାନେ ବାଧ୍ୟହୋଇ ପୁରୁଣା ଓ ଚିରାଫଟା ପୋଷାକ ପିନ୍ଧି ବିଦ୍ୟାଳୟ ଆସୁଛନ୍ତି। ଭଦ୍ରକ, ବାଲେଶ୍ବର ସମେତ କିଛି ଜିଲାରେ ଏଭଳି ଅବ୍ୟବସ୍ଥା ଦେଖାଦେଇଛି।
ଛାତ୍ରଛାତ୍ରୀଙ୍କୁ ୟୁନିଫର୍ମ ଯୋଗାଇ ଦେବାକୁ ଗତ ଜୁନ୍ରେ ଜିଲା ଶିକ୍ଷା ଅଧିକାରୀମାନଙ୍କୁ ନିର୍ଦେଶ ଦିଆଯାଇଥିଲା। ଜୁଲାଇ ୧୫ ସୁଦ୍ଧା ୟୁନିଫର୍ମ ଯୋଗାଇବାକୁ କୁହାଯାଇଥିଲା। ଏପର୍ଯ୍ୟନ୍ତ ୟୁନିଫର୍ମ ନ ମିଳିବାରୁ ବହୁ ଛାତ୍ରଛାତ୍ରୀ ପୁରୁଣା ପୋଷାକରେ ବିଦ୍ୟାଳୟ ଆସୁଛନ୍ତି। ୟୁନିଫର୍ମ ମିଳିବାରେ ବିଳମ୍ବ ନେଇ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ବିଭାଗୀୟ ଅଧିକାରୀଙ୍କ ସହ ଆଲୋଚନା କରିଛନ୍ତି। ତୁରନ୍ତ ପିଲାଙ୍କୁ ୟୁନିଫର୍ମ ଯୋଗାଇ ଦେବାକୁ ବିଭାଗ ପକ୍ଷରୁ ନିର୍ଦେଶ ଦିଆଯାଇଛି। ମନ୍ତ୍ରୀ କହିଛନ୍ତି, ଅଧିକାଂଶ ଜିଲାରେ ୮୦%ରୁ ଅଧିକ ଛାତ୍ରଛାତ୍ରୀଙ୍କୁ ୟୁନିଫର୍ମ ଯୋଗାଇ ଦିଆଯାଇଛି।
କିଛି ସ୍ଥାନରେ ୟୁନିଫର୍ମ ମିଳିବାରେ ବିଳମ୍ବ ହୋଇଛି। ସ୍ବୟଂ ସହାୟକ ଗୋଷ୍ଠୀ (ଏସଏଚଜି) ମାଧ୍ୟମରେ ୟୁନିଫର୍ମ ଦେବାକୁ ନିଷ୍ପତ୍ତି ନିଆଯାଇଥିଲା। ନିର୍ଦ୍ଧାରିତ ସମୟରେ ୟୁନିଫର୍ମ ଦେବାରେ କେତେକ ଏସ୍ଏଚ୍ଜି ବିଳମ୍ବ କରୁଛନ୍ତି। ଉକ୍ତ ଏସ୍ଏଚ୍ଜିକୁ ବାତିଲ କରି ବିଦ୍ୟାଳୟ ପରିଚାଳନା କମିଟି (ଏସ୍ଏମ୍ସି) ଜରିଆରେ ୟୁନିଫର୍ମ ଶୀଘ୍ର ଦେବାର ବ୍ୟବସ୍ଥା କରାଯିବ।
