ସୋରଡ଼ା: ନିଜ ସନ୍ତାନ ଉପରେ ଦୁଃଖ ପଡିଲେ ପାହାଡ଼ ସଦୃଶ ଛିଡା ହୋଇଥାନ୍ତି ବାପା। ଆଜି ଏହି ଘଟଣାର ପ୍ରମାଣ ମିଳିଛି ଗଞ୍ଜାମ ଜିଲାର ସୋରଡ଼ା ବ୍ଲକରେ। ବଡଗଡ଼ ଥାନା ମେରିକୋଟ ପଞ୍ଚାୟତ ଗୁନାଖାଲ ଗ୍ରାମରେ ବିଦ୍ୟୁତ ଆଘାତରୁ ପୁଅକୁ ବଞ୍ଚାଇବାକୁ ଯାଇ ନିଜ ଜୀବନ ହାରିଛନ୍ତି ବାପା। ପୁଅକୁ ବଞ୍ଚାଇବାକୁ ଯାଇ ବିଦ୍ୟୁତ ଆଘାତରେ ଗ୍ରାମର ଟୁଟୁ ଗୌଡ଼ (୨୫)ଙ୍କ ମୃତ୍ୟୁ ଘଟିଛି। ଗୁନାଖାଲ ଗ୍ରାମରେ ଟୁଟୁ ଗୌଡ଼ଙ୍କ ଘର ସମ୍ମୁଖରେ ଏକ ବିଦ୍ୟୁତ ଖୁଣ୍ଟ ରହିଛି। ଖୁଣ୍ଟରେ ଏକ ତାର ବିପଦସଙ୍କୁଳ ଅବସ୍ଥାରେ କିଛିଦିନ ହେଲା ଝୁଲି ରହିଥିଲା। ଶୁକ୍ରବାର ସକାଳୁ ଟୁଟୁ ନିଜ ଘରକୁ ଆସିଥିବା ଗୋପାଳପୁର ଗ୍ରାମର ବଳରାମ ଗୌଡ଼ଙ୍କ ସହ ବସି କଥାବାର୍ତ୍ତା ହେଉଥିବା ସମୟରେ ଟୁଟୁଙ୍କ ଦେଢ଼ ବର୍ଷର ପୁଅ ଝୁଲିଥିବା ବିଦ୍ୟୁତ୍ ତାରକୁ ଧରିବାକୁ ଉଦ୍ୟମ କରୁଥିଲା।
ଟୁଟୁ ସେଠାକୁ ଦୌଡ଼ିଯାଇ ପୁଅଠାରୁ ବିଦ୍ୟୁତ୍ ତାର ଛଡାଇବାବେଳେ ନିଜେ ବିଦ୍ୟୁତ୍ ସଂସ୍ପର୍ଶରେ ଆସି ଯାଇଥିଲେ। ଟୁଟୁଙ୍କୁ ବଞ୍ଚାଇବାକୁ ଯାଇ ବଳରାମ ମଧ୍ୟ ଆହତ ହୋଇଥିଲେ। ଗୁରୁତର ଅବସ୍ଥାରେ ଉଭୟଙ୍କୁ ଚିକିତ୍ସା ପାଇଁ ବଡଗଡ଼ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ଡାକ୍ତର ସେଠାରେ ଟୁଟୁଙ୍କୁ ମୃତ ଘୋଷଣା କରିଥିଲେ। ଆହତ ବଳରାମଙ୍କ ଅବସ୍ଥା ସ୍ଥିର ଥିବା ଜଣାପଡିଛି। ଏ ସମ୍ପର୍କରେ ବଡ଼ଗଡ଼ ଥାନାରେ ଅପମୃତ୍ୟ ମାମଲା ରୁଜୁ କରାଯାଇଛି। ମୃତଦେହକୁ ବ୍ୟବଛେଦ ନିମନ୍ତେ ପଠାଯାଇଥିବା ବଡଗଡ଼ ଥାନା ଅଧିକାରୀ କହିଛନ୍ତି। ଏହି ଘଟଣା ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳାଇଦେଇଛି।
Comments are closed.