ବାଙ୍ଗାଲୋରର କେ.ସି.ଜେନେରାଲ ଡ଼ାକ୍ତରଖାନାରେ ରୋଗୀଙ୍କ ଓଢ଼ଣୀ ଓ ଶାଢ଼ୀ ପିନ୍ଧା ଉପରେ ଲାଗିଛି ପ୍ରତିବନ୍ଧକ । ଏଠାରେ କରୋନା ସଂକ୍ରମିତ ଦୁଇଜଣ ମହିଳା ରୋଗୀ ଶାଢ଼ୀରେ ଫାଶୀ ଲଗାଇ ଆତ୍ମହତ୍ୟା କରିବା ପରେ ଡ଼ାକ୍ତରଖାନା କର୍ତ୍ତୃପକ୍ଷ ମହିଳା ରୋଗୀଙ୍କ ଲାଗି ଡ଼୍ରେସକୋଡ଼୍ ବଦଳାଇବା ନିଷ୍ପତ୍ତି ନେଇଛନ୍ତି । ନୂଆ ବ୍ୟବସ୍ଥା ଅନୁସାରେ ମହିଳା ରୋଗୀମାନେ ଅପରେସନ ଥିଏଟରରେ ପିନ୍ଧା ଯାଉଥିବା ଡ଼୍ରେସ ପିନ୍ଧିବେ । ହସପିଟାଲ ସୁପରିଟେଣ୍ଡେଣ୍ଟ ଏ ସମ୍ପର୍କରେ ସୂଚନା ଦେଇଛନ୍ତି ।
କେ.ସି.ଜେନେରାଲ ହସପିଟାଲରେ ୨୬ ଜୁନ୍ ଓ ୧୭ ଜୁଲାଇରେ କରୋନା ସଂକ୍ରମିତ ୨ ଜଣ ମହିଳା ରୋଗୀ ଶୌଚାଳୟରେ ଫାଶୀ ଲଗାଇ ଆତ୍ମହତ୍ୟା କରିଥିଲେ । ଉଭୟଙ୍କ ବୟସ ପ୍ରାୟ ୬୦ ବର୍ଷ ପାଖାପାଖି ଥିଲା । ତେଣୁ ଡ଼ାକ୍ତରଖାନା କର୍ତ୍ତୃପକ୍ଷ ଏଥିନେଇ କଟକଣା ଚଳାଇଛନ୍ତି । ଏହା ବ୍ୟତୀତ ଜଣେ ରୋଗୀଙ୍କ ଉପରେ ତାଙ୍କ ପାଖ ବେଡ଼ର ଅନ୍ୟରୋଗୀମାନେ ନଜର ରଖିବାକୁ ପରାମର୍ଶ ଦିଆଯାଇଛି । ଯଦି କୌଣସି ଅବସାଦଗ୍ରସ୍ତ ରୋଗୀ ଶୌଚାଳୟ ଯାଉଛନ୍ତି ତାଙ୍କ ଉପରେ ଅନ୍ୟ ରୋଗୀମାନେ ଦୃଷ୍ଟି ରଖିବାକୁ ମଧ୍ୟ କୁହାଯାଇଛି । ସେହିପରି ରୋଗୀମାନଙ୍କୁ ନିଦ ହେବା ପାଇଁ ଔଷଧ ଦେବାକୁ ମଧ୍ୟ ବିଚାର କରାଯାଉଛି ବୋଲି ଡ଼ାକ୍ତରଖାନା ଅଧୀକ୍ଷକ କହିଛନ୍ତି ।
