ସମ୍ବଲପୁର: ସମ୍ବଲପୁର ମୁଖ୍ୟ କୃଷି ଅଧିକାରୀଙ୍କୁ ତାଙ୍କ କାର୍ଯ୍ୟାଳୟରେ ସାକ୍ଷାତ କରି ଯୁଯୋମୁରା ବ୍ଲକକୁ ଗଜା ମରୁଡି ଘୋଷଣା କରିବା ଦାବିରେ ପଡିଆବାହାଲ ଜୟଦୁର୍ଗା କୃଷକ କ୍ଳବ ପକ୍ଷରୁ ଏକ ଦାବିପତ୍ର ପ୍ରଦାନ କରାଯାଇଛି। କୃଷକ କ୍ଳବ ପକ୍ଷରୁ କହିଛି ଯେ ଯୁଯୋମୁରା ବ୍ଲକର ଅଧିକାଂଶ ଚାଷ ଜମି ଅଣଜଲସେଚିତ ଥିବାବେଳେ ଖରିଫ ଚାଷ ସ୍ୱଳ୍ପ ବୃଷ୍ଟପାତ ଯୋଗୁଁ ଅଧିକାଂଶ ଅଞ୍ଚଳରେ ଆଗେଇ ପାରୁନାହିଁ।
ଏପରି ସ୍ଥଳେ ଗଜା ମରୁଡି ର ସମ୍ଭାବନା ସୃଷ୍ଟି କଲାଣି। ତେଵେ ଏଠାରେ ପୁଣି ଚାଷୀମାନେ ଆର୍ଥିକ ଦୃଷ୍ଟିରୁ ଦୁର୍ବଳ। ଏଭଳି ପରିସ୍ଥିତିରେ ବିଶେଷ ରୂପେ ଆସନ୍ନ ମରୁଡି ଚାଷୀମାନଙ୍କୁ ମାନସିକ ଚାପଗ୍ରସ୍ତ କରାଇ ଗଭୀର ଭାବରେ ନିରାଶା ଭିତରକୁ ଠେଲି ଦେଇଛି। ଏ ନେଇ ସମ୍ବଲପୁର ମୁଖ୍ୟ ଜିଲା କୃଷି ଅଧିକାରୀଙ୍କୁ ଆବଶ୍ୟକ ପଦକ୍ଷେପ ନେବାକୁ ଦାବି କରି ଯୁଯୋମୁରା ବ୍ଲକକୁ ଗଜାମରୁଡି ବ୍ଲକ ଘୋଷଣା କରିବା ପାଇଁ ଏକ ଦାବିପତ୍ର ଦେଇ ଅନୁରୋଧ କରାଯାଇଛି।
ଏହି ଦାବିପତ୍ର ଦେବା ଅବସରରେ ସଭାପତି ମୃତ୍ୟୁଞ୍ଜୟ ପାଣିଗ୍ରାହୀ, ସଭ୍ୟ ନନ୍ଦୀକେଶ ସାହୁ, ରୁଦ୍ରପ୍ରସନ୍ନ ବଡ଼ପଣ୍ଡା, ବିରେନ ଦୀପ, ପୁର୍ଣ୍ଣ ରୋହିଦାସ ପ୍ରମୁଖ ଉପସ୍ଥିତ ଥିଲେ।
