ବିଳମ୍ବରେ ହେଲା ଭୋଟ ଗ୍ରହଣ, ଅଧ୍ୟକ୍ଷ ଭାବେ ବିଜୟୀ ହେଲେ ସୁନୀଲ କୁମାର ପଣ୍ଡା

ସାକ୍ଷୀଗୋପାଳ: ସତ୍ୟବାଦୀ ପଞ୍ଚାୟତ ସମିତି ସଭାଗୃହରେ ଆଜି ପଞ୍ଚାୟତ ସମିତି ଅଧ୍ୟକ୍ଷ ପଦ ନିମନ୍ତେ ନିର୍ବାଚନ ଅନୁଷ୍ଠିତ ହୋଇଥିଲା। ବିଜୁ ଜନତା ଦଳ ତରଫରୁ ସୁନୀଲ କୁମାର ପଣ୍ଡା ଓ ଭାରତୀୟ ଜନତା ପାର୍ଟି ତରଫରୁ ଦୀପକ କୁମାର ଶତପଥି ପ୍ରାର୍ଥୀପତ୍ର ଦାଖଲ କରିଥିଲେ। ଜଣେ ସଦସ୍ୟ ଅନୁପସ୍ଥିତ ଥିବାରୁ ଭୋଟ ଗ୍ରହଣ ବିଳମ୍ବିତ ହୋଇଥିଲା। ଅପରାହ୍ଣ ୪ଟା ସମୟରେ ଭୋଟ ଗ୍ରହଣ ଅନୁଷ୍ଠିତ ହୋଇଥିଲା। ଏହି ନିର୍ବାଚନରେ ବିଜେଡ଼ି ପ୍ରାର୍ଥୀ ସୁନୀଲ କୁମାର ପଣ୍ଡା ୧୪ଟି ଭୋଟ ପାଇଥିଲେ।

ବିଜେପି ପ୍ରାର୍ଥୀ ଦୀପକ କୁମାର ଶତପଥି ୯ ଗୋଟି ଭୋଟ ପାଇଥିଲେ। ୫ଟି ଅଧିକ ଭୋଟ ବ୍ୟବଧାନରେ ସୁନୀଲ କୁମାର ପଣ୍ଡା ପଞ୍ଚାୟତ ସମିତି ଅଧ୍ୟକ୍ଷ ଭାବେ ନିର୍ବାଚିତ ହୋଇଥିଲେ। ନିର୍ବାଚନ ଅଧିକାରୀ ତଥା ସତ୍ୟବାଦୀ ମଣ୍ଡଳ ଉନ୍ନୟନ ଅଧିକାରୀ କ୍ଷୀରୋଦ କୁମାର ବେହେରା ବିଜେଡି ପ୍ରାର୍ଥୀ ସୁନୀଲ କୁମାର ପଣ୍ଡାଙ୍କୁ ବିଜୟୀ ଘୋଷଣା କରିଥିଲେ।