ଲଡୁଗାଁ : ଭବାନୀପାଟଣାରୁ ବୋରିଗୁମାକୁ ସଂଯୋଗ କରୁଥିବା ଜାତୀୟ ରାଜପଥ ୨୬ କୋକସରା ବ୍ଲକ ଚିଲିଗୁଡା ଗ୍ରାମ ନିକଟରେ ଥିବା ମୁଣ୍ଡୁରା ନଦୀ ପୋଲ ନିମ୍ନମାନର କାମ ଯୋଗୁଁ ବାରମ୍ଵାର ଫାଟ ସୃଷ୍ଟି ହେଉଛି । ଯଦ୍ୱାରା ଯାତ୍ରୀବାହୀ ହେଉ ଅବା ଭାରୀଯାନ ପ୍ରତିଟି ମୁହୂର୍ତ୍ତରେ ଦୁର୍ଘଟଣାକୁ ଆମନ୍ତ୍ରଣ କରୁଛି । ଏହି ରାସ୍ତା ଦେଇ ଦିନକୁ ଦିନ ଯାନବାହାନ ଚଳାଚଳ ବୃଦ୍ଧି ପାଉଥିବାବେଳେ ଅମାନିଆଙ୍କ ଗାଡ଼ିର ବେଗରେ ମଧ୍ୟ ଅଙ୍କୁଶ ଲାଗୁନି । ତା ଉପରେ ରାସ୍ତାର ଏଭଳି ଅବସ୍ଥା । ଜନସାଧାରଣଙ୍କ ଗମନାଗମନ ସୁବିଧା ପାଇଁ ପୁରୁଣା ପୋଲକୁ ଗତ କିଛି ବର୍ଷ ତଳେ ଭାଙ୍ଗି ନୂତନ ପୋଲ ନିର୍ମାଣ କରାଗଲା । ତେବେ ସେହି ସମୟରେ ନିର୍ମାଣ ଦାୟିତ୍ୱରେ ଥିବା ଠିକାସଂସ୍ଥା ଓ ବିଭାଗୀୟ ଯନ୍ତ୍ରୀ ମିଲିଭଗତରେ ପୋଲ ନିର୍ମାଣ କାର୍ଯ୍ୟ ଅତି ନିମ୍ନମାନର କରି କାମ ସାରି ଦେଇଥିବା ଜଣାପଡିଛି । ଯାହାଦ୍ବାରା ଏବେ ଏହି ପୋଲର ସ୍ଲାବ ଜଏଣ୍ଟ ସ୍ଥାନରେ ଲାଗିଥିବା ଲୁହା ରେଲିଂ ସବୁ ଦୁର୍ବଳ ସହ ଫାଟ ସୃଷ୍ଟି ହୋଇ ଦୁର୍ଘଟଣାର କାରଣ ସାଜିଛି ।
ପୂର୍ବରୁ ମଧ୍ୟ ଉକ୍ତ ପୋଲ ଦୁର୍ବଳ ସହ ଫାଟ ହୋଇଥିବା ନେଇ ଗଣମାଧ୍ୟମରେ ଖବର ପ୍ରକାଶିତ ପରେ ତରବରିଆ ଭାବେ ଜାତୀୟ ରାଜପଥ ବିଭାଗ ପକ୍ଷରୁ ମରାମତି କାର୍ଯ୍ୟ ହୋଇଥିଲା । ଏବେ ପୁଣି ପୋଲର ଏଭଳି ମରାମତି କାର୍ଯ୍ୟ ମଧ୍ଯ ନିମ୍ନମାନର ହୋଇଥିବା ଓ ପୋଲର ସ୍ଥାୟୀତ୍ୱକୁ ନେଇ ଅଞ୍ଚଳର ଜନସାଧାରଣ ଚିନ୍ତା ପ୍ରକଟ କରିଛନ୍ତି । ଅଞ୍ଚଳର କିଛି ସଚେତନ ନାଗରିକମାନେ ବିଭିନ୍ନ ସୋସିଆଲ ମିଡିଆରେ ଦୁର୍ବଳ ପୋଲର ଫଟୋ ପୋଷ୍ଟ କରି ଭାଇରାଲ କରୁଥିବା ଦେଖିବାକୁ ମିଳୁଛି। କେସିଙ୍ଗା ଜାତୀୟ ରାଜପଥ ବିଭାଗୀୟ ଅଧିକାରୀ କେବେ ପୋଲ ମରାମତି ନେଇ ଦୃଷ୍ଟି ଦେବେ ନା କୌଣସି ଅଘଟଣ ଘଟିଲେ ବିଭାଗ ଚେତିବ ତାହା କୁ ହିଁ ଅପେକ୍ଷା । ପୋଲ ମରାମତି ଦିଗରେ ଜାତୀୟ ରାଜପଥ ବିଭାଗୀୟ ଅଧିକାରୀ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି ।
