ରେଙ୍ଗାଲିକ୍ୟାମ୍ପ: ଗତ କିଛି ମାସ ଧରି ଉଭୟ ପୁଅ ଓ ଝିଅ ଲୁଚାଛପାରେ ପ୍ରେମ କରି ଆସୁଥିଲେ । ଯାହାକୁ ନେଇ ଉଭୟ ପରିବାରରେ ମନୋମାଳିନ୍ୟ ସୃଷ୍ଟି ହୋଇଥିଲା । ସ୍ଥାନୀୟ ସରପଞ୍ଚଙ୍କ ଉଦାର ମନୋଭାବ ଯୋଗୁଁ ପ୍ରେମୀ ଯୁଗଳ ଆଜି ବିବାହ ବନ୍ଧନରେ ବାନ୍ଧି ହୋଇଛନ୍ତି । ଅତାବିରା ବ୍ଲକର ଲହଣ୍ଡା ପଞ୍ଚାୟତରେ ଏଭଳି ଏକ ଘଟଣା ଦେଖିବାକୁ ମିଳିଛି । ସିଲେଟ ପଞ୍ଚାୟତର ସିଲେଟ ଗ୍ରାମର ଯୁବକ ଭକ୍ତ ପ୍ରସାଦ ଗୁରୁ ଓ ଲହଣ୍ଡା ଗ୍ରାମର ସୁମିତ୍ରା ଭୁଏଙ୍କ ମଧ୍ୟରେ ଗତ କିଛି ମାସ ଧରି ପ୍ରେମ ସମ୍ପର୍କ ଗଢ଼ି ଉଠିଥିଲା। କିନ୍ତୁ ଉଭୟଙ୍କ ପରିବାର ଏହି ପ୍ରେମ ସମ୍ପର୍କକୁ ବିରୋଧ କରୁଥିଲେ । ଫଳରେ ଗତ ୨୦ ତାରିଖ ଦିନ ସେମାନେ ଘରୁ ଅନ୍ୟତ୍ର ଚାଲିଯାଇଥିଲେ । ଉଭୟ ପରିବାର ଖୋଜାଖୋଜି କରିବା ପରେ ସୋମବାର ପୁଅର ପରିବାର ବର୍ଗ ତାଙ୍କ ସନ୍ଧାନ ପାଇ ସେମାନଙ୍କୁ ଗାଁକୁ ନେଇ ଆସିଥିଲେ । କିନ୍ତୁ ତାଙ୍କ ସଂପର୍କକୁ ବିରୋଧ କରି ଝିଅକୁ ତାଙ୍କ ଘରେ ଛାଡ଼ି ଦେଇ ପୁଅକୁ ନେଇଯିବା ପାଇଁ ପ୍ରସ୍ତୁତ ହେବା ବେଳେ ସେମାନଙ୍କ ମଧ୍ୟରେ ବାହାଘର ନ ହେଲେ ଉଭୟ ପ୍ରେମୀ ଯୁଗଳ ବିଷ ଖାଇ ଆତ୍ମହତ୍ୟା କରିବୁ ବୋଲି କହିଥିଲେ । ଫଳରେ ଉଭୟ ପରିବାର ଏକଥା ସରପଞ୍ଚଙ୍କୁ ଜଣାଇଥିଲେ ।
ପ୍ରେମୀ ଯୁଗଳ ସାବାଳକ ଓ ସାବାଳିକା ହୋଇଥିବାରୁ ନିଜେ ନିଜର ନିଷ୍ପତ୍ତି ନେଇ ପାରିବାର ଅଧିକାର ରହିଥିବା ତଥା ପରିସ୍ଥିତିର ଗମ୍ଭୀରତାକୁ ଅନୁଧ୍ୟାନ କରି ସରପଞ୍ଚ ଅର୍ଜୁନ ନାଏକ ନିଜର ମାନବିକତା ଦେଖାଇ ଉଭୟଙ୍କୁ ବିବାହ ପାଇଁ ସାହାଯ୍ୟ ସହଯୋଗ କରିଥିଲେ । ଏପରିକି ନିକଟସ୍ଥ ଗୋଡଭଗା ସମଲେଶ୍ଵରୀ ମନ୍ଦିରରେ ଉଭୟ ପରିବାରଙ୍କୁ ଡକାଇ ସରପଞ୍ଚ ଅର୍ଜୁନ ନାଏକ ଓ କିଛି ସମାଜସେବୀଙ୍କ ଉପସ୍ଥିତିରେ ବୈଦିକ ରୀତିରେ ପ୍ରେମୀ ଯୁଗଳଙ୍କ ବିବାହ ଉତ୍ସବ ମଧ୍ୟ ହୋଇଥିଲା । ସରପଞ୍ଚଙ୍କ କହିବା ଅନୁସାରେ, ସେମାନେ ପ୍ରଥମେ ଅତାବିରା ଗ୍ରାମ୍ୟ ନ୍ୟାୟାଳୟରେ ରେଜିଷ୍ଟ୍ରି ବିବାହ ପରେ ପାରମ୍ପରିକ ରୀତି ନୀତି ଅନୁସାରେ ବିବାହ କରିବେ ବୋଲି କହିଥିଲେ । ତେଣୁ ଝିଅର ବାପା ମାଲିଆ ଭୁଏ ଓ ପୁଅର ବାପା ରାମକୃଷ୍ଣ ଗୁରୁ ତଥା ଉଭୟ ପରିବାର ବର୍ଗଙ୍କ ଉପସ୍ଥିତିରେ ରେଜିଷ୍ଟ୍ରି ବିବାହ କରିବା ପରେ ମା’ ସମଲେଶ୍ଵରୀ ମନ୍ଦିରରେ ଉଭୟ ପୁଅ ଓ ଝିଅ ବିବାହ ବନ୍ଧନରେ ବାନ୍ଧି ହୋଇ ନୂତନ ବୈବାହିକ ଜୀବନ ଆରମ୍ଭ କରିଛନ୍ତି । ସରପଞ୍ଚଙ୍କ ସମେତ ସ୍ଥାନୀୟ ଅଞ୍ଚଳର ଅନେକ ବ୍ୟକ୍ତି ଏହି ବିବାହ କାର୍ଯ୍ୟରେ ସାମିଲ ହୋଇଥିଲେ ।
Comments are closed.