ଭାରତୀୟ ରିଜର୍ଭ ବ୍ୟାଙ୍କ-ଆରବିଆଇର କେନ୍ଦ୍ରୀୟ ବୋର୍ଡରେ ବିଭିନ୍ନ କ୍ଷେତ୍ରର ପ୍ରତିଷ୍ଠିତ ବର୍ଗର ୭ ଜଣଙ୍କ ସମେତ ୯ ଜଣ ଅଣ-ସରକାରୀ ନିର୍ଦ୍ଦେଶକ ନିଯୁକ୍ତ ହୋଇନଥିବାରୁ ଅସୁବିଧା ସୃଷ୍ଟି ହେଉଥିବା ଜଣାପଡିଛି। କେନ୍ଦ୍ରୀୟ ବୋର୍ଡ ହେଉଛି ଆରବିଆଇ ଗଭର୍ଣ୍ଣରଙ୍କ ନେତୃତ୍ୱରେ ଥିବା ସର୍ବୋଚ୍ଚ ବ୍ୟାଙ୍କର ସର୍ବୋଚ୍ଚ ନିଷ୍ପତ୍ତି ଗ୍ରହଣକାରୀ ସଂସ୍ଥା। ଆରବିଆଇ ଅଧିନିୟମ ଅନୁଯାୟୀ ସରକାର ବିଭିନ୍ନ କ୍ଷେତ୍ରରୁ ୧୦ ଜଣ ବିଶିଷ୍ଟ ବ୍ୟକ୍ତିଙ୍କୁ ଆରବିଆଇର କେନ୍ଦ୍ରୀୟ ବୋର୍ଡକୁ ମନୋନୀତ କରିବା ସହ ଚାରିଟି ସ୍ଥାନୀୟ ବୋର୍ଡରୁ ଜଣେ ଲେଖାଏଁ ନିର୍ଦ୍ଦେଶକଙ୍କୁ ନିଯୁକ୍ତ କରିଥାନ୍ତି।
ପଶ୍ଚିମାଞ୍ଚଳ ଏବଂ ଦକ୍ଷିଣାଞ୍ଚଳର ସ୍ଥାନୀୟ ବୋର୍ଡର ପ୍ରତିନିଧିତ୍ୱ ପାଇଁ ସରକାର ଏ ଯାଏଁ କୌଣସି ପ୍ରସ୍ତାବ ଦେଇନଥିବା ବେଳେ ବିଭିନ୍ନ କ୍ଷେତ୍ରର ବିଶିଷ୍ଟ ବ୍ୟକ୍ତିଙ୍କ ବର୍ଗରୁ ୭ ଜଣ ଅଣ-ସରକାରୀ ନିର୍ଦ୍ଦେଶକ ନିଯୁକ୍ତ କରିନାହାଁନ୍ତି। ସମ୍ପ୍ରତି କେବଳ ତିନିଜଣ ବିଶିଷ୍ଟ ବ୍ୟକ୍ତି – ଟାଟା ସନ୍ସର ଅଧ୍ୟକ୍ଷ ନଟରାଜନ୍ ଚନ୍ଦ୍ରଶେଖରନ୍, ବ୍ୟାଙ୍କର ଏସ୍ କେ ମରାଠେ ଏବଂ ଚାର୍ଟାର୍ଡ ଆକାଉଣ୍ଟାଣ୍ଟ ସ୍ୱାମୀନାଥନ ଗୁରୁମୂର୍ତ୍ତି କେନ୍ଦ୍ରୀୟ ବୋର୍ଡରେ କାର୍ଯ୍ୟ କରୁଛନ୍ତି। ସେମାନଙ୍କୁ ଆରବିଆଇ ଅଧିନିୟମ ୧୯୩୪ର ଧାରା ୮ (୧) (ସି) ଅନୁଯାୟୀ ମନୋନୀତ କରାଯାଇଛି।
