ନୂଆଦିଲ୍ଲୀ : ପ୍ରକୃତି ନିଜ କୋଳରେ ଅନେକ ପ୍ରକାର ଜୀବଜନ୍ତୁଙ୍କୁ ସ୍ଥାନ ଦେଇଛି । ଅନେକ ସମୟରେ ଭିନ୍ନ ଭିନ୍ନ ପ୍ରାକୃତିକ ପଦାର୍ଥ, ରହସ୍ୟମୟ ଜୀବ ସାମ୍ନାକୁ ଆସୁଛନ୍ତି ଯାହା ମାନବ ଜଗତକୁ ଚକିତ କରୁଛି । ଏବେ ଏମିତି ଏକ ଆଶ୍ଚର୍ଯ୍ୟଜନକ ଦୃଶ୍ୟ ଦେଖିବାକୁ ମିଳୁଛି ଯାହାକୁ ଦେଖି ସମସ୍ତେ ଚମତ୍କାର ବୋଲି କହୁଛନ୍ତି । ସୋସିଆଲ ମିଡିଆରେ ଏକ ଧଳା କୁମ୍ଭୀରର ଫଟୋ ଭାଇରାଲ ହେଉଛି ଯାହା ଦେଖିଲେ ଆପଣ ନିଜ ଆଖିକୁ ବିଶ୍ବାସ କରିପାରିବେନି । ଦେଖନ୍ତୁ ଏହି ଭିଡିଓ…
ଭାଇରାଲ ହେଉଥିବା ଏହି ଭିଡିଓ ଓ ଫଟୋ ଫ୍ଲୋରିଡାର ବୋଲି କୁହାଯାଉଛି । ଏଠାରେ ଏକ କୁମ୍ଭୀର ପାର୍କରେ ବିରଳ ଧଳା ଘଡିଆଳ ଜନ୍ମ ନେଇଛି । ଏହାର ଫଟୋ ଓ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଭିଡିଓରେ କୁନି ଘଡିଆଳଟି ଅଣ୍ଡାରୁ ବାହାରୁଥିବା ନଜର ଆସୁଛି । ଏହା ବିଶ୍ବର ପ୍ରଥମ ଧଳା ଘଡିଆଳ ବୋଲି କୁହାଯାଉଛି ।
ସୋସିଆଲ ମିଡିଆ ପ୍ଲାଟଫର୍ମ ଇନଷ୍ଟାଗ୍ରାମରେ ଏହି ପୋଷ୍ଟକୁ ଗେଟୋରଲ୍ୟାଣ୍ଡ ଓରଲ୍ୟାଣ୍ଡୋ ପାର୍କର ହ୍ୟାଣ୍ଡେଲରୁ ସେୟାର କରାଯାଇଛି । ଭିଡିଓରେ ୨-୩ଟି ଅଣ୍ଡା ନଜର ଆସୁଛି ଯେଉଁଥିରେ କିଛି ସାଧାରଣ ରଙ୍ଗର ଶାବକ ଜନ୍ମ ନେଉଛନ୍ତି । କିନ୍ତୁ ଗୋଟିଏ ଅଣ୍ଡାରୁ ବିରଳ ଧଳା ରଙ୍ଗର ଘଡିଆଳ ବାହାରିବା ନଜର ଆସୁଛି । ଭିଡିଓ ସେୟାର କରି କ୍ୟାପ୍ସନରେ ଏମିତି ଘଟଣା ପ୍ରଥମ ଥର ବୋଲି ଲେଖାଯାଇଛି । କୁହାଯାଉଛି କି ଏହା ଏକ ପ୍ରକାର ଜେନେଟିକ୍ ଦୋଷ ଯୋଗୁଁ ହୋଇଥାଏ । ଏହି କାରଣରୁ ଚର୍ମର ରଙ୍ଗରେ ପରିବର୍ତ୍ତନ ନଜର ଆସିଥାଏ ।
