ନୂଆଦିଲ୍ଲୀ: ରାଜସ୍ଥାନ ବିଧାନସଭା ନିର୍ବାଚନକୁ ନେଇ ରାଜ୍ୟ ରାଜନୀତି ସରଗରମ ରହିଛି । ଭୋଟରକୁ ଆକୃଷ୍ଟ କରିବା ପାଇଁ ଆଶୟୀ ପ୍ରାର୍ଥୀମାନେ ଭିନ୍ନ ଭିନ୍ନ ଉପାୟ ଆପଣାଇଛନ୍ତି । ଗୋଟିଏ ରାଜନୈତି ଦଳ ପକ୍ଷରୁ ପ୍ରାର୍ଥୀଙ୍କ ନାମ ଘୋଷଣା କରାଯାଇଥିବା ବେଳେ ପ୍ରଶାସନ ଅଧିକାରୀ ଭୋଟରଙ୍କ ସଂଖ୍ୟା ବୃଦ୍ଧି କରିବା ଲକ୍ଷ୍ୟରେ ରଚନାତ୍ମକ ଢଙ୍ଗରେ ପ୍ରଚାର ଆରମ୍ଭ କରିଛନ୍ତି । ସ୍ଥାନୀୟ ଜିଲାପାଳ ଭୋଟରଙ୍କୁ ଭୋଟ କେନ୍ଦ୍ର ପର୍ଯ୍ୟନ୍ତ ନେବା ଏବଂ ଭୋଟ୍ ର ମହତ୍ତ୍ବ ବୁଝାଇବାକୁ ଏକ ନୂଆ ଉପାୟ ଅବଲମ୍ବନ କରି ଜାଗୃତ ଅଭିଯାନ ଚଳାଇଛନ୍ତି ।
ବିଭିନ୍ନ ପ୍ରକାର ଖେଳ, କାର୍ଟୁନ, ପାମ୍ପରିକ ନୃତ୍ୟ ଏବଂ ରେଡିଓ ସାହାଯ୍ୟରେ ମତଦାନ ପ୍ରତିଶତ ବୃଦ୍ଧି ପାଇଁ ଉଦ୍ୟମ ଚାଲିଛି । ଜାଗୃତ ଅଭିଯାନର ପ୍ରଚାର ପ୍ରସାର ପାଇଁ ଜିଲା ଅଧିକାରୀ ଲୋକପ୍ରିୟ କାର୍ଟୁନ ଛୋଟା ଭୀମର ସାହାଯ୍ୟ ନେଇଛନ୍ତି ।
ସେହିପରି ଆଜମେରର ଜିଲାପାଳ ଆରତି ଡୋଗରା ସାପ ସିଡି ଖେଳକୁ ରଚନାତ୍ମକ ଭାବେ ପରିବେଶଣ କରି ମତଦାତାଙ୍କୁ ସେମାନଙ୍କ ଭୋଟ୍ ର ମହତ୍ତ୍ବ ବୁଝାଇବାର ଦାୟିତ୍ବ ନେଇଛନ୍ତି । ନିର୍ବାଚନ ଆୟୋଗ ମଧ୍ୟ ଏହି ଅଭିଯାନକୁ ପ୍ରଶଂସା କରିଛନ୍ତି । ହନୁମାନଗଢ ଜିଲାର ଜିଲାପାଳ ଦିନେଶ ଜୈନ ବୋଟୁ ନାମକ ଏକ କ୍ଷୁଦ୍ର କାର୍ଟୁନ ସାହାଯ୍ୟରେ ଭୋଟରଙ୍କୁ ପ୍ରୋତ୍ସାହିତ କରିବାକୁ ଉଦ୍ୟମ କରିଛନ୍ତି ।
ସୂଚନାଯୋଗ୍ୟ, ଡିସେମ୍ବର ୭ ତାରିଖରେ ରାଜସ୍ଥାନରେ ବିଧାନସଭା ନିର୍ବାଚନ ଅନୁଷ୍ଠିତ ହେବ । ପ୍ରତି ୨୦୦ ମିଟର ଦୂରତାରେ ମତଦାନ କେନ୍ଦ୍ର କରାଯିବ । ପ୍ରତି ୫ ବର୍ଷରେ ସରକାର ବଦଳୁଥିବା ପରମ୍ପରା ଭାଙ୍ଗି ବିଜେପି ପୁଣି ଥରେ କ୍ଷମତାରେ ରହିବାକୁ ପ୍ରୟାସ କରୁଛି । ଅନ୍ୟପକ୍ଷରେ କଂଗ୍ରେସ ଭୋଟରଙ୍କ ଆକ୍ରୋଶକୁ ଭୁଲାଇ ସରକାର ଗଢିବାର ଆଶା ବାନ୍ଧିଛି।
