ନୂଆଦିଲ୍ଲୀ: ପୂର୍ବତନ ପ୍ରଧାନମନ୍ତ୍ରୀ ସ୍ବର୍ଗତ ରାଜୀବ ଗାନ୍ଧୀଙ୍କ ୨୮ତମ ଶ୍ରାଦ୍ଧ ଦିବସ ଅବସରରେ ମଙ୍ଗଳବାର କଂଗ୍ରେସ ମହାସଚିବ ତଥା ତାଙ୍କ ଝିଅ ପ୍ରିୟଙ୍କା ଗାନ୍ଧୀ ଭଦ୍ରା ଏବଂ ପୁଅ ରାହୁଲ ଗାନ୍ଧୀ ଶ୍ରଦ୍ଧାଞ୍ଜଳି ଜଣାଇଛନ୍ତି। ପୂର୍ବାହ୍ନରେ ପ୍ରିୟଙ୍କା ଓ ରାହୁଲ ମା’ ସୋନିଆ ଗାନ୍ଧୀଙ୍କ ସହିତ ଦିଲ୍ଲୀ ସ୍ଥିତ ବୀରଭୂମିରେ ପହଞ୍ଚି ରାଜୀବଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହ, ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀ ଏବଂ ପ୍ରିୟଙ୍କାଙ୍କ ସ୍ବାମୀ ରବର୍ଟ ଭଦ୍ରା ଉପସ୍ଥିତ ରହି ଶ୍ରଦ୍ଧାଞ୍ଜଳି ଜଣାଇଥିଲେ।
ସେହିପରି ନିକଟରେ ରାଜୀବ ଗାନ୍ଧୀଙ୍କୁ ବିଭିନ୍ନ ପ୍ରସଙ୍ଗରେ ସମାଲୋଚନା କରି ତାଙ୍କୁ ଭ୍ରଷ୍ଟାଚାରୀ ନମ୍ବର ୧ ବୋଲି କହିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ମଙ୍ଗଳବାର ଟ୍ବିଟ୍ କରି ଶ୍ରଦ୍ଧାଞ୍ଜଳି ଜଣାଇଛନ୍ତି।
ଏହି ଅବସରରେ ପ୍ରିୟଙ୍କା ଏକ ପୋଷ୍ଟ କରି ତାଙ୍କ ବାପା ତାଙ୍କ ପାଇଁ ହିରୋ ଥିଲେ ବୋଲି କହିଛନ୍ତି। ସେହିପରି ରାହୁଲ ଟ୍ବିଟ୍ କରି କହିଛନ୍ତି, ତାଙ୍କ ବାପା ଜଣେ ଭଦ୍ର, ସ୍ନେହଶୀଳ, ଦୟାଳୁ ବ୍ୟକ୍ତି ଥିଲେ। ସମସ୍ତଙ୍କୁ ଭଲ ପାଇବା ଏବଂ ସମ୍ମାନ ଦେବାକୁ ସେ ମୋତେ ଶିକ୍ଷା ଦେଇଛନ୍ତି। କାହାକୁ ଘୃଣା ନ କରିବା ଏବଂ ସମସ୍ତଙ୍କୁ କ୍ଷମା ଦେବାକୁ ସେ କୁହନ୍ତି। ମୁଁ ତାଙ୍କୁ ବହୁତ ମିସ୍ କରୁଛି।’
