ରାଜଗାଙ୍ଗପୁର : ଗୁହାଳ ପାଲଟିଛି ମୁକ୍ତାକାଶ ଜିମ୍। ଗାଈଗୋରୁ ବନ୍ଧା ହେଉଛନ୍ତି, ସବୁଆଡେ ଗୋବର ଓ ଆବର୍ଜନା। ସରକାରଙ୍କର ମୁକ୍ତାକାଶ ଜିମ୍ ଯୋଜନା ଏଠାରେ ପ୍ରହସନ ପାଲଟିଛି। ଏଭଳି ଦୃଶ୍ୟ ଦେଖିବାକୁ ମିଳିଛି ସୁନ୍ଦରଗଡ଼ ଜିଲା ରାଜଗାଙ୍ଗପୁର ସହରରେ। ଲକ୍ଷ ଲକ୍ଷ ଟଙ୍କାର ଜିମ୍ ଉପକରଣ ଖତ ଖାଉଛି। ଅଥଚ ଯୋଜନା ଯାହାଙ୍କ ପାଇଁ ସେମାନେ ଏହାର ଲାଭ ପାଇପାରୁ ନାହାନ୍ତି। ଇତିମଧ୍ୟରେ ତିନି ବର୍ଷ ଅତିବାହିତ ହେଲାଣି। ବିଭାଗୀୟ ଅଧିକାରୀମାନଙ୍କର ନିଘା ନାହିଁ।
ସୂଚନା ଅନୁଯାୟୀ, ୨୦୨୨ ମସିହା ବିଜେଡି ସରକାରଙ୍କ ୫-ଟି ମୁକ୍ତାକାଶ ଯୋଜନାରେ ରାଜଗାଙ୍ଗପୁର ପୌରାଞ୍ଚଳର ପ୍ରାୟ ୧୦ଟି ୱାର୍ଡରେ, ୱାର୍ଡ ପିଛା ୬ରୁ ୭ ଲକ୍ଷ ଟଙ୍କା ବିନିମୟରେ ଏହି ମୁକ୍ତାକାଶ ଜିମ୍ ତିଆରି ହୋଇଥିଲା। ଏହି ଯୋଜନାରେ ୱାର୍ଡ ନମ୍ବର ୫ରେ ଥିବା କଲ୍ୟାଣ ମଣ୍ଡପ ପରିସରରେ ଏକ ମୁକ୍ତାକାଶ ଜିମ୍ ସ୍ଥାପନ କରାଯାଇଥିଲା। ମାତ୍ର ଏହା ଗୋରୁ ଗୁହାଳରେ ପରିବର୍ତ୍ତିତ ହୋଇଥିବା ଲକ୍ଷ୍ୟ କରାଯାଉଛି। ଲୋକେ ବ୍ୟାୟାମ କରିବା ପରିବର୍ତ୍ତେ ଗାଈ ଗୋରୁ ବନ୍ଧା ହେଉଥିବା ଦେଖିବାକୁ ମିଳିଛି। ଚାରି ଆଡେ ଗୋବର ପଡ଼ି ରହିଛି, ଜିମ୍ ପରିବେଶ ଦୂଷିତ ହେଉଛି। ଫଳରେ ଜିମ୍ କାର୍ଯ୍ୟକାରୀ ହେଇପାରୁନାହିଁ। ଆଖପାଖ ଅଞ୍ଚଳବାସୀ ଜିମ୍ର ଲାଭ ଉଠାଇ ପାରୁନାହାନ୍ତି। ରାଜଗାଙ୍ଗପୁର ପୌରପାଳିକା ଶୀଘ୍ର ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
