ବେଗୁନିଆ: ଅଟ୍ରି ରେଳ ରହଣିସ୍ଥଳ (ପାସେଞ୍ଜର ହଲ୍ଟ)ବୁଧବାର ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କ ଦ୍ବାରା ଲୋକାର୍ପିତ ହୋଇଛି। ସ୍ଥାନୀୟ ଲୋକଙ୍କ ଦୀର୍ଘଦିନର ଦାବି ଏହାଦ୍ବାରା ପୂରଣ ହୋଇଛି। ଅଟ୍ରିରୁ ଏକ ପାସେଞ୍ଜର ରେଳଗାଡ଼ି ଗଡିଛି। ଅଟ୍ରି ରେଳ ରହଣି ସ୍ଥଳରେ ଭଦ୍ରକ – ଦଶପଲ୍ଲା, ଭୁବନେଶ୍ୱର – ଦଶପଲ୍ଲା ଓ ପୁରୀ- ଦଶପଲ୍ଲା ଆଦି ୩ଟି ପାସେଞ୍ଜର ରେଳଗାଡ଼ି ରହଣି କରିବାର ବ୍ୟବସ୍ଥା କରାଯାଇଛି। ଖୋର୍ଦ୍ଧା-ବଲାଙ୍ଗିର ରେଳପଥରେ ଏକ ନୂଆ ରେଳ ରହଣି ସ୍ଥଳ ଯୋଡ଼ି ହୋଇଛି ବୋଲି ଅତିଥିମାନେ କହିଛନ୍ତି। ଅଟ୍ରି ସମ୍ପ୍ରତି ପର୍ଯ୍ୟଟନ ସ୍ଥଳୀର ମାନ୍ୟତା ପାଇଥିବାବେଳେ ଏହାର ନୂଆ ପରିଚୟ ସୃଷ୍ଟି ହୋଇପାରିବ।
ଏହି ରେଳ ରହଣିସ୍ଥଳ ଦ୍ବାରା ଲୋକମାନେ ବିଶେଷ ଉପକୃତ ହେବେ ଏବଂ ସ୍ୱଳ୍ପ ମୂଲ୍ୟରେ ଯାତାୟାତ କରିପାରିବେ ବୋଲି ମୁଖ୍ୟଅତିଥି ସାଂସଦ ଶ୍ରୀମତୀ ଷଡ଼ଙ୍ଗୀ କହିଛନ୍ତି। ବିଶେଷ କରି ଏହି ରେଳ ରହଣି ସ୍ଥଳ ଦ୍ବାରା ୧୫ରୁ ଅଧିକ ପଞ୍ଚାୟତର ଲକ୍ଷାଧିକ ଲୋକ ଉପକୃତ ହୋଇପାରବେ ବୋଲି ଜଣାପଡ଼ିଛି। ଡିସେମ୍ବର ସୁଦ୍ଧା ସାନପଦରରେ ଆଉଏକ ରେଳ ରହଣିସ୍ଥଳ ଲୋକାର୍ପଣ କରାଯିବ ବୋଲି ସାଂସଦ ଶ୍ରୀମତୀ ଷଡ଼ଙ୍ଗୀ କହିଛନ୍ତି। କାର୍ଯ୍ୟକ୍ରମରେ ବେଗୁନିଆ ବିଧାୟକ ପ୍ରଦୀପକୁମାର ସାହୁ, ଖୋର୍ଦ୍ଧା ବିଧାୟକ ପ୍ରଶାନ୍ତ କୁମାର ଜଗଦ୍ଦେବ ଓ ଖୋର୍ଦ୍ଧାରୋଡ଼ ରେଳ ମଣ୍ଡଳ ପ୍ରବନ୍ଧକ ହରବିନ୍ଦର ସିଂ ବାଜୱା ପ୍ରମୁଖ ଉପସ୍ଥିତ ଥିଲେ।
ଏହି ରେଳପଥରେ ପ୍ରଥମ ଥର ପାଇଁ ଭୁବନେଶ୍ୱର -ଦଶପଲ୍ଲା ରେଳଗାଡ଼ିକୁ ନୀଳ ପତାକା ଦେଖାଇ ସାଂସଦ ଶୁଭାରମ୍ଭ କରିଥିଲେ। ରେଳବିଭାଗ ସିଏଲଆଇ ଚିତ୍ତରଞ୍ଜନ ନାୟକ ମଞ୍ଚ ସଞ୍ଚାଳନ କରିଥିବା ବେଳେ ଶିକ୍ଷାବିତ୍ ଅକ୍ଷୟ କୁମାର ମହାପାତ୍ର ଧନ୍ୟବାଦ ଦେଇଥିଲେ।
Comments are closed.