ପୁରୀ: ଶ୍ରୀ ଜଗନ୍ନାଥ ମନ୍ଦିର ପତିତପାବନ ବାନାରେ ପଡିଛି ଶୂନ୍ୟ ଗଣ୍ଠି। ଏହା ଏକ ବିରଳ ଘଟଣା ବୋଲି ଚୁନରା ସେବକ କହିଛନ୍ତି। କାଳ ବୈଶାଖୀ ଯୋଗୁ ଏଭଳି ବିରଳ ଘଟଣା ଦେଖା ଦେଇଛି। ମଙ୍ଗଳବାର ପୁରୀରେ ଘଡଘଡି ସହ ବର୍ଷା ହୋଇଥିଲା। ସେଥିରେ ପତିତପାବନ ବାନା ବନ୍ଧା ଯାଇଥିବା ବାଉଁଶ ନଇଁ ଯାଇଥିଲା। ତେବେ ପତିତପାବନ ବାନା ସଂପୂର୍ଣ୍ଣ ସୁରକ୍ଷିତ ରହିଥିଲା। ପରମ୍ପରା ଅନୁଯାୟୀ ଚୁନରା ସେବକ ଅପରାହ୍ନରେ ପତିତପାବନ ବାନା ପରିବର୍ତ୍ତନ କରିଥିଲେ। ପୁରୁଣା ବାନା ଖୋଲାଯାଇ ନୀଳଚକ୍ରରେ ନୂଆ ବାନା ଲଗାଇଥିଲେ।
ତେବେ ଖୋଲା ଯାଇଥିବା ବାନାରେ ଆପେ ଆପେ ଗଣ୍ଠି ପଡ଼ି ଯାଇଥିବା ଦେଖିବାକୁ ମିଳିଛି। ପତିତପାବନ ବାନାରେ କିପରି ଗଣ୍ଠି ପଡ଼ିଲା ତାହା ଭକ୍ତ ଓ ସେବାୟତଙ୍କୁ ବିସ୍ମିତ କରିଛି। ଏ ସଂପର୍କରେ ଶ୍ରୀ ମନ୍ଦିର ପ୍ରଶାସନର କୌଣସି ଅଧିକାରୀଙ୍କ ପ୍ରତିକ୍ରିୟା ମିଳି ପାରିନାହିଁ।
