ଭୁବନେଶ୍ୱର: ଏନଡିଏ ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ଭୋଟ୍ ଦେଇଛନ୍ତି କଂଗ୍ରେସ ବିଧାୟକ ମହମ୍ମଦ ମୋକିମ । ଭୋଟ ଦେବାପରେ ମାଟିର ଝିଅକୁ ଭୋଟ ଦେଇଛି ବୋଲି ଗଣମାଧ୍ୟମ ଆଗରେ ପ୍ରତିକ୍ରିୟା ରଖିଛନ୍ତି କଟକର ବାରବାଟୀ ବିଧାୟକ । ସେ କହିଛନ୍ତି କି, ମୁଁ ଜଣେ ଓଡ଼ିଆ । ଆଉ ଜଣେ ଓଡ଼ିଆ ହିସାବରେ ମୋର ଏହି ନିଷ୍ପିତ୍ତି ନେଇଛି । ମୋର ବିବେକ ହିସାବରେ ମୁଁ ଜଣେ ଓଡ଼ିଆ ଝିଅକୁ ଭୋଟ ଦେଲି ।
ତାଙ୍କ ବିଜୟରେ ମୋର ଭୋଟ୍ ଖଣ୍ଡକ ମିଶିଲେ ମୁଁ ଗର୍ବିତ ହେବି । ରାଷ୍ଟ୍ରପତି ନିର୍ବାଚନରେ ହୁଇପ୍ ନଥାଏ । ବିବେକ ଅନୁସାରେ ଭୋଟ ଦିଅନ୍ତି ବୋଲି କଟକର ବାରବାଟୀ ବିଧାୟକ ମହମ୍ମଦ ମୋକିମ କହିଛନ୍ତି । ହେଲେ ମୋକିମଙ୍କ ଏହି ଦଳ ବିରୋଧୀ ଭୋଟକୁ ନେଇ କଂଗ୍ରେସ ପକ୍ଷରୁ କଡ଼ା ବିରୋଧ କରାଯାଇଥିବା ଦେଖିବାକୁ ମିଳିଛି । କାରଣ କଂଗ୍ରେସ ପକ୍ଷରୁ ଏନଡିଏ ପ୍ରାର୍ଥୀ ଦ୍ରୌପଦୀଙ୍କୁ ଭୋଟ୍ ନଦେବା ନେଇ ସ୍ପଷ୍ଟ କରାଯାଇଥିଲା । ଏନେଇ ପିସିସି ସଭାପତି ଶରତ ପଟ୍ଟନାୟକ ମୁହଁ ଖୋଲିଥିବା ବେଳେ ଗଣମାଧ୍ୟମ ଆଗରେ ଦ୍ରୌପଦୀଙ୍କୁ ଭୋଟ୍ ଦିଆଯିବ ନାହିଁ ବୋଲି ରୋକଠୋକ୍ କହିଥିଲେ କଂଗ୍ରେସର ବିଧାୟକ ଦଳ ନେତା ନରସିଂହ ମିଶ୍ର ।
Comments are closed.