ନ୍ୟୁୟର୍କ: ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କର ପରବର୍ତ୍ତୀ ଶୁଳ୍କ ପାଇଁ ହଲିଉଡ ଉପରେ ନଜର ରଖିଛନ୍ତି, ଆମେରିକା ବାହାରେ ନିର୍ମିତ ସମସ୍ତ ଚଳଚ୍ଚିତ୍ର ଉପରେ ୧୦୦%ର ଏକ ଉଚ୍ଚ ହାରରେ ଶୁଳ୍କ ଲଗାଇବାକୁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଚେତାବନୀ ଦେଇଛନ୍ତି।
ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଅନ୍ୟ ଦେଶଗୁଡ଼ିକୁ ଆମେରିକାର “ଚଳଚ୍ଚିତ୍ର ନିର୍ମାଣ କ୍ଷମତା ଚୋରି” କରିବାର ଅଭିଯୋଗ କରିଥିଲେ ଏବଂ କହିଥିଲେ ଯେ ସେ ସମସ୍ତ ବିଦେଶୀ ନିର୍ମିତ ଚଳଚ୍ଚିତ୍ର ଉପରେ ଏହି ନୂତନ ଆମଦାନୀ କର ଲାଗୁ କରିବାର ପ୍ରକ୍ରିୟା ତୁରନ୍ତ ଆରମ୍ଭ କରିବାକୁ ବାଣିଜ୍ୟ ବିଭାଗ ଏବଂ ଆମେରିକୀୟ ବାଣିଜ୍ୟ ପ୍ରତିନିଧିଙ୍କୁ ଅଧିକାର ଦେଇଛନ୍ତି। ତେବେ କେବେଠାରୁ ଏହି ଶୁଳ୍କ ଲାଗୁ ହେବ ସେଥିନେଇ କୌଣସି ନିର୍ଦ୍ଦିଷ୍ଟ ତାରିଖ ଘୋଷଣା କରାଯାଇନାହିଁ। ସୋମବାର ପର୍ଯ୍ୟନ୍ତ ଏ ସଂକ୍ରାନ୍ତରେ କୌଣସି ଚୂଡ଼ାନ୍ତ ନିଷ୍ପତ୍ତି ନିଆଯାଇ ନାହିଁ ବୋଲି ହ୍ୱାଇଟ୍ ହାଉସ୍ ପକ୍ଷରୁ କୁହାଯାଇଛି।
ଆମେରିକା ରାଷ୍ଟ୍ରପତି ଟ୍ରମ୍ପ ପରେ କହିଥିଲେ ଯେ ଏହି ପ୍ରସ୍ତାବ ଉପରେ ସେ ଶିଳ୍ପ କାର୍ଯ୍ୟନିର୍ବାହୀଙ୍କୁ ସାକ୍ଷାତ କରିବେ ଏବଂ ଏହି ଅବସରରେ ଆନ୍ତର୍ଜାତୀୟ ପ୍ରଡକ୍ସନ ଉପରେ ଆମଦାନୀ କର କିପରି କାର୍ଯ୍ୟକାରୀ କରାଯାଇପାରିବ ସେ ସମ୍ପର୍କରେ ଆଲୋଚନା କରିବେ। ଏହାପରେ ଆମେରିକା ବାହାରେ ନିର୍ମିତ ସମସ୍ତ ଚଳଚ୍ଚିତ୍ର ଉପରେ ୧୦୦%ର ଏକ ଉଚ୍ଚ ହାରରେ ଶୁଳ୍କ କାର୍ଯ୍ୟକାରୀ ହେବ।
