କଲକାତା: ପିଏନବି ଦୁର୍ନୀତିରେ ଅନ୍ୟତମ ଅଭିଯୁକ୍ତ ମେହୁଲ ଚୌକସୀଙ୍କ ଦ୍ୱାରା ହଂକଂରେ ଖୋଲାଯାଇଥିବା କମ୍ପାନୀର ନିର୍ଦେଶକ କଲକାତାରୁ ଗିରଫ ହୋଇଛି। ପ୍ରବର୍ତ୍ତନ ନିର୍ଦେଶାଳୟ(ଇଡି) ପକ୍ଷରୁ ଅନୁଷ୍ଠିତ ଏକ ମିଳିତ ଚଢଉରେ ନିର୍ଦେଶକ ଜଣକ ଗିରଫ ହୋଇଛନ୍ତି। ମେହୁଲ ଚୌକସୀ ପଞ୍ଜାବ ନ୍ୟାସନାଲ ବ୍ୟାଙ୍କରୁ ୧୩,୫୦୦କୋଟି ଟଙ୍କା ଜାଲିଆତି କରି ଫେରାର ଅଛନ୍ତି।
ଏ ସମ୍ପର୍କରେ ଇଡିଙ୍କ ଜନୈକ ବରିଷ୍ଠ ଅଧିକାରୀ ସୂଚନା ଦେଇ କଲକାତା ବିମାନବନ୍ଦରରୁ ଚୌକସୀଙ୍କ ହଂକଂ କମ୍ପାନୀ ନିର୍ଦେଶକ ଦୀପକ କୃଷ୍ଣ ରାଓ କୁଲକର୍ଣ୍ଣିଙ୍କୁ ଗିରଫ କରାଯାଇଛି। ଇଡି ଦ୍ୱାରା ପ୍ରଦତ୍ତ ସୂଚନା ଅନୁଯାୟୀ ମେହୁଲ ଗୀତାଞ୍ଜଳୀ ନାମକ ଏକ କମ୍ପାନୀ ଖୋଲିବା ସହ ଏକାଧିକ ଜାଲ କମ୍ପାନୀ ମଧ୍ୟ ଖୋଲିଥିଲେ। ଉକ୍ତ ଜାଲ କମ୍ପାନୀଗୁଡ଼ିକ ମଧ୍ୟରୁ ଗୋଟିଏ କମ୍ପାନୀ ହଂକଂରେ ରହିଛି। ଏହାର ନିର୍ଦେଶକ ଦୀପକ କୁଲକର୍ଣ୍ଣି ବୋଲି ଉଲ୍ଲେଖ କରାଯାଇଛି। ପିଏନବି ଦୁର୍ନୀତି ପଦାକୁ ଆସିବା ପରେ ମେହୁଲଙ୍କ ସମେତ ଦୀପକଙ୍କ ନାମରେ ମଧ୍ୟ ଜାମିନ ବିହୀନ ୱାରେଣ୍ଟ ଥିଲା। ପୂର୍ବରୁ ଏହି ଘଟଣାରେ ମେହୁଲ ଓ ନୀରବ ମୋଦୀଙ୍କ ବିରୋଧରେ ସିବିଆଇ ଓ ଇଡି ପକ୍ଷରୁ ଜାଞ୍ଚ ଜାରି ରହିଛି।
