ପିପିଲି : ବିହାରରୁ ପୁରୀ ଓ କୋଣାର୍କକୁ ବୁଲିବାକୁ ଆସିଥିବା ପର୍ଯ୍ୟଟକଙ୍କ ଏକ ବସ୍ରେ ହଠାତ୍ ନିଆଁ ଲାଗି ଯାଇଥିବା ବେଳେ ଏକ ନିଶ୍ଚିତ ବିପଦରୁ ଅଳ୍ପକେ ଯାତ୍ରୀମାନେ ବର୍ତ୍ତି ଯାଇଥିବା ସୂଚନା ମିଳିଛି ।
ବିହାରର କଟିହାର ଜିଲାର ୬୦ଜଣ ପର୍ଯ୍ୟଟକ ପୁରୀ ଓ କୋଣାର୍କ ପରିଭ୍ରମଣ କରିବା ପରେ ଘରକୁ ଫେରୁଥିବା ବେଳେ ମଙ୍ଗଳବାର ସକାଳେ ପିପିଲିର ଜଗନ୍ନାଥପୁର ଗ୍ରାମ ନିକଟରେ ଏହି ଅଘଟଣ ଘଟିଥିଲା । କୋଣାର୍କରୁ ଏହି ବସ୍ଟି ଭୁବନେଶ୍ୱର ଅଭିମୁଖେ ଯାଉଥିବା ବେଳେ ଜଗନ୍ନାଥପୁର ଗ୍ରାମ ଠାରେ ବସ୍ର ପଛ ପାଶ୍ୱର୍ରେ ହଠାତ ନିଆଁ ଲାଗି ଧୂଆଁ ବାହାରିଥିଲା । ଏହା ଦେଖି ବସ୍ର ଯାତ୍ରୀମାନେ ଚିତ୍କାର କରିବା ପରେ ବସ୍ର ଚାଳକ ଗାଡିକୁ ସେଠାରେ ରଖି ଦେଇଥିଲେ । ବସ୍ର ପଛ ପାର୍ଶ୍ୱ ଜଳୁଥିବାର ଦେଖି ନିକଟସ୍ଥ କେନାଲରୁ ପାଣି ଆଣି ଯାତ୍ରୀମାନେ ନିଆଁକୁ ଲିଭାଇଥିଲେ ।
ସଟ୍ସର୍କିଟ୍ ଯୋଗୁଁ ଏହି ଅଗ୍ନିକାଣ୍ଡ ଘଟିଥିବା ବେଳେ ପିପିଲିରୁ ମେକାନିକ ଆସି ମରାମତି କରିବା ପରେ ଅପରାହ୍ନରେ ବସ୍ଟି ବିହାର ଅଭିମୁଖେ ଯାଇଥିଲା । ଏଥିଯୋଗୁଁ ବସ୍ର ପଛ ଡିକିରେ ଥିବା ପିଲାଙ୍କ ଖେଳଣା, ରୋଷେଇ ସାମଗ୍ରୀ ଓ ପୋଷାକ ଆଦି ପୋଡି ଯାଇଥିବା ସୂଚନା ମିଳିଛି ।
Comments are closed.